8-oktabr kuni Hornby bitiruvchilarining onlayn konferensiyasi bo‘lib o‘tdi. Onlayn uchrashuv dasturning O‘zbekistondagi bitiruvchilariga bag‘ishlandi.
Qayd etilishicha, ushbu dastur 1961-yilda tashkil etilgan bo‘lib, ingliz tili o‘qituvchilari orasida juda mashhur. Turli yo‘nalishlar bo‘yicha magistrlik dasturlarini taqdim etadi:
- boshlang‘ich sinf o‘quvchilariga dars berish;
- o‘qituvchilarning malakasini oshirish;
- ta’limda AKTdan foydalanish;
- ingliz tili darslarida baholash va boshqalar.
Onlayn uchrashuvda Janubiy Amerika, Afrika, Markaziy, Janubiy va Janubi-Sharqiy Osiyodan 48 nafar bitiruvchi ishtirok etgan.
O‘zbekistonlik Hornby bitiruvchilari Nodira Isamuxamedova, Elyanora Mengliyeva, Erkin Muhamedov, Nargiza Qo‘chqorova, Komila Tangirova va Nilufar Begiboyeva xalqaro hamkorlar bilan birgalikda yirik milliy loyihalarda ishtirok etish orqali islohotlarning asosiy jarayonlari va tarkibiy qismlari haqida tushunchalarini qanday shakllantirgani haqida so‘zlab bergan.
Britaniya Kengashi ularning mutaxassis sifatida rivojlanishiga yordam berdi va bu ularga Hornby stipendiya dasturini yutib olish imkonini berdi. O‘z navbatida, Buyuk Britaniyada o‘qish davomida olingan bilim, ko‘nikma va malakalar bitiruvchilarga o‘z mamlakatida izlanuvchan mutaxassis bo‘lib yetishishlariga imkon berdi. Ingliz tili o‘qituvchilarini tayyorlash va qayta tayyorlash tizimini isloh qilish, bo‘lajak ingliz tili o‘qituvchilarini tayyorlash tizimini isloh qilish, turli kasb vakillari uchun ingliz tilini o‘rgatish dasturlarini yaratish, o‘qituvchilar uchun maxsus maqsadli ingliz tili dasturlari (UzTESPING, Netruz) bevosita bitiruvchilar ishtirokida amalga oshirildi.
Loyihalarda ishtirok etish orqali dastur bitiruvchilari o‘z loyihalarini yaratishda yordam bergan yetakchilik fazilatlarini rivojlantirdilar. Masalan, Nodira Isamuxamedova O‘zbekistondagi 8 mingdan ortiq ingliz tili o‘qituvchilariga malaka oshirishda yordam beruvchi Mentor Hub va ELT Uz – English Language Teachers from Uzbekistan kanallariga asos solgan. Xalq ta’limi vazirligi huzuridagi O‘qituvchilar uyushmasini boshqarib kelgan Nargiza Qo‘chqorova endilikda Prezident va ixtisoslashtirilgan maktablarni rivojlantirish agentligining pedagog kadrlarni tanlash va malakasini oshirish boshqarmasiga rahbarlik qilmoqda. Svetlana Xon qator milliy “Fly High”, “Kid’s English” va “Teyen’s English” ingliz tili darsliklari muallifi bo‘ldi.
“British Council mamlakatimizda ingliz tilini o‘qitish sifatini oshirish va targ‘ib qilishda muhim rol o‘ynadi. Hornby dasturi va Britaniya Kengashi bizga, ishtirokchilarga turli loyihalar bilan ishlash bo‘yicha barcha zarur bilim va tajribani berdi, buning natijasida biz mamlakatimizda chet tilini o‘rganish va o‘qitish tizimi va yondashuvlarini isloh qilish bo‘yicha umumiy tushunchaga ega bo‘ldik”, - deya o‘rtoqlashdi Hornby dasturi bitiruvchilaridan biri Nodira Isamuxamedova.
Hornby ta’lim fondi A.S. Hornby tomonidan 1961-yilda tashkil etilib, Jamg‘armaning asosiy vazifasi ingliz tilini o‘qitish va o‘rganishni yaxshilashdan iborat bo‘lib, stipendiya Buyuk Britaniyadan bo‘lmagan ingliz tili mutaxassislari, jumladan, o‘qituvchilar, mutaxassislar, inspektorlar va o‘quv materiallari mualliflariga beriladi. Hozirda Uorvik universiteti tomonidan taqdim etilayotgan stipendiya mutaxassislarga TESOL (Teaching English to Speakers of English Languages) bo‘yicha magistr darajasini olish imkoniyatini beradi.
Grant dasturi o‘qish to‘lovlarini (bir yil), yashash xarajatlarini, sayohat va boshqa xarajatlarni qoplaydi. Nomzodlar suhbat va IELTS, TOEFL yoki PTE xalqaro testlari natijalariga ko‘ra tanlanadi.
Bu to‘liq stipendiya dasturi bo‘lib, har yili butun dunyo bo‘ylab oliy ma’lumotga ega va stajyor yoki o‘qituvchi sifatida tajribaga ega bo‘lgan ingliz tili o‘qituvchilariga taklif etiladi. Jamg‘arma tashkil etilganidan buyon butun dunyodan ingliz tili o‘qituvchilari uchun 500 dan ortiq stipendiya ajratdi.
Izoh (0)