Toshkent shahrida 17-oktabr kuni chang to‘zoni kuzatildi. Shu kuni poytaxt dunyo reytingida havosi eng iflos shahar sifatida birinchi o‘ringa chiqqan. Bu kabi holat 2021-yil noyabr oyida ham kuzatilgan edi.
Chang bo‘roni haqida fikrlarni bilish maqsadida “Daryo” muxbiri aholining ayrim vakillari orasida kichik so‘rovnoma o‘tkazdi.
Fikr bildirganlardan biri havoning ifloslanishiga insonlarning o‘zi sabab bo‘layotganini aytib o‘tdi. “Ekologiyaga e’tibor yo‘q. Tozalikka umuman rioya qilinmayapti. Shahar borgan sari ifloslanyapti. Odamlar o‘zini atrofini toza tutmaydi. Birinchi va eng asosiy sababi insonlarning o‘zi”, — deydi u.
Bekatda avtobus kutayotgan qizning so‘zlariga ko‘ra, havoda chang miqdorining ortishiga daraxtlar kamligi, borlari ham kesib tashlanayotgani sabab bo‘lmoqda.
“Toshkentda havo ifloslanishiga sabab transport ko‘p. Ishlab chiqarish natijasida zavodlar ko‘plab tutun chiqaradi. Zaharli havoni yutadigan daraxtlar ham kamayib ketgan. Odam ko‘p, daraxt kam”, — deydi suhbatdosh.
Yana bir ishtirokchi chang to‘zoniga oxirzamon alomati sifatida qarashini ta’kidladi. “Oxirzamon kelyapti. Buning alomatlari. Mashinalar va texnika ko‘p. Ishlab chiqarish ko‘payyapti. Odamlar zaharlanyapti”, — deydi u.
Izoh (0)