O‘zbekistonda 2022-yilda 18 mingdan ortiq jonivorni ovlashga ruxsat berilgani xabar qilingandi. Davlat ekologiya qo‘mitasi tomonidan yovvoyi hayvonlar va O‘zbekiston Respublikasining Qizil kitobiga kiritilgan noyob, yo‘qolib borayotgan hayvonlarni ovlashga qaratilgan kvota haqida e’lon qilingan xabar yuzasidan ma’lumot berdi.
Qayd etilishicha, respublika hududida yovvoyi hayvonlarni tabiiy muhitdan ajratib olish (ovlash, tutish, yig‘ish) O‘zbekiston Respublikasining 2020-yil 8-iyuldagi “Ov qilish va ovchilik xo‘jaligi to‘g‘risida”gi qonunga muvofiq amalga oshiriladi. Qonunning 14-15-moddalariga asosan kvota belgilanadi.
Ushbu Qonunga muvofiq Davlat ekologiya qo‘mitasi yovvoyi hayvonlarni tutishga doir kvotani Fanlar akademiyasining xulosasini inobatga olgan holda tasdiqlaydi. O‘z navbatida, Fanlar akademiyasi yovvoyi hayvonlarni tabiatdan ovlash bo‘yicha xulosasini ilmiy asoslangan holda o‘rganadi, tabiatdagi mavjud bo‘lgan soniga aniqlik kiritib, faqat ma’lum miqdorigagina beradi.
Ushbu kvota yovvoyi hayvonlarni faqat sport va havaskorlik uchun ovlash uchun emas, balki ilmiy jihatdan o‘rganish va nazorat qilish maqsadida belgilanadi. Shuningdek, ularni sun’iy yaratilgan pitomniklarda ko‘paytirish, farmatsevtikada foydalanish ham qonun bilan belgilangan.
Qizil kitobga kiritilgan 4 bosh Qizilqum arxari va 4 bosh morxo‘r faqatgina ko‘paytirish va tabiatga qo‘yib yuborish uchun berilgani aniq ko‘rsatib o‘tilgan.
Tasdiqlangan kvotadagi ayrim hayvonlarning migratsiya yo‘llarini o‘rganish maqsadida tutilib, ularga tegishli belgilar (mikrochip, uzuk) qo‘yiladi yoki ulardan tahlil olinib tiriklayin tabiatga qo‘yib yuborish uchun ham ajratiladi.
Izoh (0)