Kecha, 8-avgust kuni Ozarbayjon va Armaniston Vashingtonda tinchlik deklaratsiyasini imzoladi. O‘zbekiston Tashqi ishlar vazirligi mazkur masala yuzasidan bayonot berdi.
Maʼlum qilinishicha, O‘zbekiston Ozarbayjon va Armaniston o‘rtasidagi tinchlik muzokaralarida muhim natijaga erishilganini olqishlaydi.
“Kuni kecha Vashingtonda tarixiy qo‘shma deklaratsiyaning imzolanishiga Ozarbayjon Respublikasi va Armaniston Respublikasi yetakchilarining kuchli siyosiy irodasi va qatʼiyati, shuningdek, Amerika Qo‘shma Shtatlari prezidentining faol tinchlikparvar saʼy-harakatlari tufayli erishildi, deb hisoblaymiz. Barcha tomonlarning ko‘p yillik mojaroni bartaraf etishga qaratilgan saʼy-harakatlarini yuqori baholaymiz. Ishonchimiz komilki, Janubiy Kavkazda uzoq muddatli tinchlik va barqarorlikning imkon qadar tezroq o‘rnatilishi keng mintaqamizdagi barcha xalqlar manfaati uchun yirik transport va infratuzilmaviy loyihalarni amalga oshirishga zamin yaratadi”, deyiladi vazirlik bayonotida.
Maʼlumot uchun, qirq yillik mojarodan so‘ng Armaniston va Ozarbayjon rahbarlari Nikol Pashinyan va Ilhom Aliyev Vashingtonda AQSH prezidenti Donald Tramp ishtirokida tinchlik deklaratsiyasini imzoladi. Deklaratsiyada allaqachon kelishilgan tinchlik shartnomasini imzolash va ratifikatsiya qilish jarayonini tezlashtirish zarurligi taʼkidlangan.
Ozarbayjon va Armaniston tashqi ishlar vazirlari Vashingtonda shartnomani parafladi, yaʼni kelishilgan matnni tasdiqladi. Deklaratsiyada mintaqada aloqalarni tiklash muhimligi va Ozarbayjonning asosiy hududi bilan uning eksklavi Naxichevan o‘rtasida Armaniston hududidan, uning Eron bilan chegarasi bo‘ylab o‘tadigan transport yo‘lagini yaratish masalasi ham ko‘tarilgan.
“Bugun biz Janubiy Kavkazda tinchlik o‘rnatmoqdamiz va yangi buyuk tarixni yozmoqdamiz”, degan Ozarbayjon prezidenti.
Armaniston bosh vaziri esa bu kelishuv “tinchlik bobini ochishi”ni bildirgan.
“Biz o‘tmishdagidan yaxshiroq tarix uchun poydevor qo‘ymoqdamiz”, deya qo‘shimcha qilgan u.
“Bu davlatlar jangovar harakatlarni butunlay to‘xtatish, savdo-sotiq, sayohat va diplomatik aloqalarni qayta tiklash, bir-birining suvereniteti va hududiy yaxlitligini hurmat qilish majburiyatini olmoqda”, degan Tramp ikki rahbar bilan o‘tkazilgan qo‘shma matbuot anjumanida.
“Ular shuncha yillar davomida juda azob chekishdi, ko‘pchilik, jumladan Yevropa Ittifoqi, ruslar yechim topishga urinishdi, lekin natija bo‘lmadi. Ammo ushbu kelishuv tufayli biz nihoyat tinchlikka erishishga muvaffaq bo‘ldik”, deb taʼkidlagan Amerika prezidenti.
Uch tomonlama uchrashuv davomida Armaniston va Ozarbayjon “Trampning xalqaro tinchlik va farovonlik yo‘lagi” deb nomlanadigan yirik tranzit yo‘lagini barpo etishga kelishib olishgan. U Armaniston hududi orqali Ozarbayjonni uning Bokuga ittifoqchi bo‘lgan Naxichevan mintaqasi bilan bog‘laydi.
Oq uy matbuot kotibi Anna Kellining taʼkidlashicha, yangi tranzit yo‘lagi “Armaniston va uning xalqi suvereniteti hamda hududiy yaxlitligini hurmat qilgan holda to‘siqsiz aloqani taʼminlaydi”.
Ozarbayjon va Naxichevanni Armaniston hududining 32 kilometrlik qismi ajratib turadi.
Boku uchun yo‘lak Naxichevan bilan to‘g‘ridan-to‘g‘ri quruqlik aloqasini taʼminlaydi, Turkiya bilan munosabatlarni mustahkamlaydi va infratuzilma diplomatiyasi orqali urushdan keyingi yutuqlarni mustahkamlaydi.
Izoh (0)