“Daryo” nashri 19-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Putin anneksiya qilingan hududlarda harbiy holat joriy etish to‘g‘risida farmon imzoladi
Rossiya davlat rahbari Vladimir Putin “Donetsk Xalq Respublikasi, Lugansk Xalq Respublikasi, Zaporojye va Xerson viloyatlari hududlarida harbiy holat joriy etish to‘g‘risida”gi Farmonni imzoladi.
Rossiyadagi “harbiy holat” yarim tundan boshlab kuchga kiradi va quyidagilarni o‘z ichiga oladi:
— Fuqarolarning mamlakat tashqarisiga chiqishini taqiqlash;
— Iqtisodiy, ijtimoiy va madaniy obyektlarni evakuatsiya qilish, shuningdek, aholini xavfsiz hududlarga vaqtincha ko‘chirish;
— Hududga kirish va chiqishning alohida rejimini joriy etish, shuningdek, u yerda harakatlanish erkinligini cheklash;
— Mudofaa ehtiyojlari uchun vazifalarni bajarishga fuqarolarni jalb qilish, dushman tomonidan qurol ishlatish oqibatlarini bartaraf etish, xo‘jalik obyektlarini tiklash.
— Tashkilotlar va fuqarolardan mudofaa ehtiyojlari uchun zarur bo‘lgan mol-mulkni keyinchalik uning qiymatining davlat tomonidan to‘lab berilishini inobatga olgan holda olib qo‘yish;
— Aloqa sohasida harbiy senzura, shuningdek, telefon suhbatlari ustidan nazoratni joriy etish.
Energodar HIMARS bilan o‘qqa tutildi. Ukraina qo‘shinlari Zaporojye AESni egallab olishga uringani aytilmoqda
Rossiya tomonidan anneksiya qilingan Zaporojye viloyatining Energodar shahri 19-oktabrga o‘tar kechasi HIMARS yoppasiga o‘t ochuvchi reaktiv tizimlari bilan o‘qqa tutildi. Bu haqda shahar hokimiyati vakili ma’lum qildi.
Zarbalar shahar ma’muriyati, Energodarga kiraverishdagi ko‘prik va “Luch” podstansiyasiga teggan. Aytishlaricha, podstansiyaga zarbadan keyin Energodar butunlay elektrsiz qolgan.
Anneksiya qilingan Zaporojye viloyati hokimiyati vakili Vladimir Rogov “RIA Novosti” agentligiga Ukraina harbiylari tunda Energodardagi Zaporojye atom elektr stansiyasini egallab olishga uringani haqida ma’lum qildi.
Janglar bir necha soat, kamida uch-uch yarim soat davom etdi. Ularning qayiqdan tushishga urinishlari qaytarildi”, — deydi Rogov.
“Tez orada Xerson uchun jang boshlanadi” — Xerson vitse-gubernatori
Ukraina armiyasi tez orada anneksiya qilingan Xersonga qarshi hujum boshlaydi. Xerson vitse-gubernatori Kirill Stremousov tinch aholiga mintaqaning o‘ng qirg‘oq qismini tark etishni qat’iy tavsiya qilmoqda.
“Bizda mavjud ma’lumotlarga ko‘ra, G‘arb tomonidan otlantirilgan ukronatsistlar yaqin orada Xerson shahriga hujum boshlaydi”, — dedi Stremousov o‘zining Telegram kanalida.Uning ta’kidlashicha, “Xerson shahrining hamda Xerson viloyatining o‘ng qirg‘oq qismi o‘qqa tutilishi istisno qilinmayapti”.
AQSH, Britaniya va Fransiya BMT Xavfsizlik kengashida Eron dronlarining Rossiyaga yetkazib berilayotgani masalasini ko‘taradi
AQSH, Buyuk Britaniya va Fransiya Birlashgan Millatlar Tashkiloti Xavfsizlik kengashining bugun, 19-oktabrda o‘tkaziladigan yopiq majlisida Eronning Rossiyaga qurol yetkazib berishi masalasini ko‘tarmoqchi, deb xabar berdi Reuters.
Ukraina Rossiyani BMT Xavfsizlik Kengashining Erondan qurol import qilishga embargo qo‘yish rezolyutsiyasini buzganlikda ayblamoqda. Nashrga izoh bergan diplomatlarning ta’kidlashicha, har uchala davlat ham Eron dronlarining olib kirilishi BMT Xavfsizlik kengashining 231-rezolyutsiyasini buzish, deb hisoblaydi. G‘arb davlatlari vakillari BMT vakilidan Xavfsizlik Kengashi a’zolarini ushbu masala bo‘yicha xabardor qilishni so‘ramoqda.
Bundan tashqari, Ukraina BMT ekspertlarini Rossiya ushbu rezolyutsiyani buzgan holda Ukrainadagi nishonlarga hujum qilish uchun foydalanayotgan Eron dronlarni kelib tekshirishga chaqirdi.
Tog‘li hududlarda qor yog‘moqda, Samarqand va Andijon yo‘llarini suv bosdi
Bugun O‘zbekistonning tog‘li hududlarida qor yog‘moqda. Andijon va Samarqand yo‘llarini suv bosdi. Ijtimoiy tarmoqlarda tarqalgan videolardan anglashilishicha, Samarqand viloyatining Bulung‘ur tumanidagi M39 avtomobil yo‘lida suv toshishi oqibatida YTHlar sodir bo‘lishi, shuningdek, avtomobillar to‘xtab qolishi yuzaga kelgan. Andijon shahrida suv bosgani xabar berilgan videoda esa shahar ko‘chalarida suv toshgani sabab avtomobillar qatnovida tirbandlik, muammolar yuzaga kelgan.
Izoh (0)