Meksika prezidenti Klaudiya Sheynbaum AQSH harbiylarining mamlakat hududiga kiritilmasligini aytdi. Bu haqda BBC xabar berdi.
Tegishli bayonot AQSH prezidenti Donald Trampning narkokartellarga qarshi harbiy kuch ishlatish rejasiga javoban e’lon qilingan. Sheynbaum Vashington va Meksika o‘rtasida faqatgina hamkorlik bo‘lishini ta’kidlagan.
“Qo‘shma Shtatlar harbiylari Meksikaga kiritilmaydi. Biz hamkorlik qilishimiz mumkin, ammo bosqinchilik bo‘lmaydi. Bunday bo‘lishi mumkin emas, mutlaqo mumkin emas”, degan Meksika rahbari.
Kartel — bu biror mahsulotni (bu kontekstda — giyohvand moddalarni) nazorat qilish va bozorda ustunlikni qo‘lga kiritish maqsadida birlashgan yirik guruh yoki tashkilot. Ular asosan Lotin Amerikasi (ayniqsa, Meksika, Kolumbiya)da faoliyat yurituvchi, giyohvand moddalarni ishlab chiqarish, kontrabanda qilish va sotish bilan shug‘ullanuvchi uyushgan jinoyatchilik tuzilmalaridir.
New York Times xabariga ko‘ra, Tramp Pentagonga Lotin Amerikasidagi narkokartellarga qarshi operatsiyaga tayyorlanish uchun maxfiy farmoyish bergan. AQSH 2025-yil boshida 8 ta kartel (6 tasi meksikalik)ni terroristik tashkilot deb e’lon qilgani bunga asos bo‘lgani aytilmoqda. Sheynbaumning aytishicha, unga Meksikaga AQSH harbiylarining kirishi haqida hech qanday ma’lumot berilmagan.
“Bu hech qanday kelishuvning bir qismi emas, undan yiroq. AQSH suverenitetimizga tajovuz qila olmaydi. Bu haqda gap ketganda, biz har doim ‘yo‘q’ deganmiz”, dedi Meksika rahbari.
Bu orada, AQSH davlat kotibi Marko Rubio kartellarni qurollangan terroristik guruhlar sifatida ko‘rib, ularga qarshi razvedka va Mudofaa vazirligi orqali choralar ko‘rish zarurligini ta’kidlamoqda.
So‘nggi oylarda Meksika va AQSH giyohvand moddalar va noqonuniy migratsiyani kamaytirish borasida hamkorlikni kuchaytirib kelmoqda. Ikki davlat chegarasida iyun oyida noqonuniy kesib o‘tish holatlari rekord darajada kamaygan. AQSHning Meksikadagi elchisi Ronald Jonson chegarada fentanil musodaralari 2 baravardan ko‘proqqa kamayganini ochiqlab, bu hamkorlik tufayli kartellar “bankrot bo‘layotgani”ni bildirgan.
Izoh (0)