Rossiya Ukrainaning muhim infratuzilmasiga hujum qilishni to‘xtatmayapti. Xususan, 19-oktabr, chorshanba kuni ular Ivano-Frankovsk viloyatidagi Burshtin issiqlik elektr stansiyasiga raketa hujumlarini uyushtirgan. Bu haqda Ivano-Frankovsk viloyati davlat ma’muriyati raisi Svetlana Onischuk Telegram sahifasida ma’lum qildi.
“Bugun viloyatimiz yana raketa hujumlariga uchradi. Burshtin IESga berilgan zarba natijasida yong‘in sodir bo‘ldi. Barcha xizmatlar ishlamoqda, qutqaruvchilar voqea joyida. Xudoga shukur, qurbonlar yo‘q”, — dedi u Telegram’dagi videomurojaatida.
Onischukning eslatishicha, Burtishnskaya IES hududidagi yo‘l to‘sib qo‘yilgan, qo‘shni qishloqlar orqali aylanma yo‘l tashkil etilgan.
Ma’muriyat rahbari, shuningdek, avvalroq fuqarolarning elektr energiyasini tejash bo‘yicha mutasaddilarning chaqirig‘iga javoban viloyatda elektr energiyasi iste’moli darajasini 15 foizga kamaytirishga erishilganini ham ta’kidlagan.
“Elektr energiyasini tejashda davom etishimiz zarur. Men hammadan soat 17:00 dan 23:00 gacha ko‘p energiya sarflaydigan elektr jihozlaridan kamroq foydalanishni so‘rayman”, — deya ta’kidladi u.
Izoh (0)