Britaniya harbiy razvedkasining ma’lum qilishicha, 2022-yilning fevralida Ukrainaga bosqin boshlangan paytda Rossiya qo‘shinlarining operativ qo‘mondonligi uchun mas’ul bo‘lgan besh generaldan to‘rt nafari allaqachon iste’foga yuborilgan. Bu haqda Britaniya Mudofaa vazirligining Twitter’da chop etilgan kundalik razvedka ma’lumotida aytiladi.
Britaniya harbiylarining fikricha, ishdan bo‘shatilgan generallarning o‘rniga kelgan komandirlar “Rossiyaning jangovar harakatlarini yaxshilash uchun bugungi kungacha ham ko‘p ish qilmagan”. Razvedka ma’lumotida ishdan bo‘shatilgan rus generallarining ismlari ko‘rsatilmagan.
Britaniya Mudofaa vazirligi o‘z sharhida Ukrainadagi “maxsus operatsiya” uchun mas’ul bo‘lgan Rossiya harbiy rahbariyati o‘z vazifalarini tobora yomonroq bajarayotganini ta’kidladi. Taktik darajada “yangi safarbar qilingan harbiylarni uyushtirish va boshqarish uchun o‘qitilgan kichik ofitserlarning yetishmasligi ko‘proq sezilmoqda”, deyiladi razvedka ma’lumotida.
Britaniya razvedkasining fikriga ko‘ra, kichik ofitserlar darajasidagi yomon qo‘mondonlik, “Rossiya qurolli kuchlarining ko‘p qismlarida shijoati past va zaif bo‘linmalarning birlashuvini kuchaytirishi mumkin”.
8-oktabr kuni Rossiya Mudofaa vazirligi Ukrainadagi Rossiya qo‘shinlarining yangi qo‘mondoni etib general Sergey Surovikinni tayinlagan edi. Shu tariqa Rossiya Mudofaa vazirligi Ukrainaga bosqin boshlanganidan beri birinchi marta qo‘shinlarga qo‘mondonlik qilgan shaxsning ismini oshkor qilgan.
Izoh (0)