O‘zbekistonda bank kartalari soni 32 milliontaga yaqinlashdi

O‘zbekistonda 2022-yilning 1-oktabr holatiga ko‘ra, muomaladagi bank kartalari soni 31,8 milliontaga yetgan. Bu haqda “Daryo”ga Markaziy bank ma’lumotlaridan ma’lum bo‘ldi.

Sentabr oyida kartalar soni yil boshidan beri eng ko‘p — 620 mingtaga keskin ko‘paygan. Bu O‘zbekiston bo‘yicha yangi o‘quv yili boshlangani bilan izohlanadi. Yil boshidan beri 4,7 mln dona bank kartasi muomalaga kiritilgan.

O‘tgan oyda banklar va to‘lov tashkilotlari tomonidan o‘rnatilgan bankomat va infokiosklar soni 19,3 mingtani tashkil etgan. 

Bundan tashqari to‘lov terminallari orqali tushgan tushumlar 14,9 trln so‘m bo‘lgan. Bu ko‘rsatkich yil boshidan beri 122,2 trln so‘mdan ko‘proqni tashkil qilmoqda.

Muomalaga kartalar chiqarish bo‘yicha banklar orasida 6,2 mln dona karta bilan “Xalq banki” yetakchilik qilmoqda.

Ikkinchi o‘rinni 3,8 mln bank kartasi bilan “Agrobank” egallagan bo‘lsa, 3 mln ko‘rsatkich bilan “Ipoteka bank” uchinchi bo‘ldi. 

Bankomat va infokiosklar o‘rnatish bo‘yicha “Kapitalbank” “Agrobank”ni ortda qoldirib birinchi o‘ringa chiqib oldi — 2 098 ta. “Agrobank”da bu borada atigi 1 dona bankomat kamroq va ikkinchi o‘rinda.