Ўзбекистонда банк карталари сони 32 миллионтага яқинлашди

Ўзбекистонда 2022 йилнинг 1 октябрь ҳолатига кўра, муомаладаги банк карталари сони 31,8 миллионтага етган. Бу ҳақда «Дарё»га Марказий банк маълумотларидан маълум бўлди.

Сентябрь ойида карталар сони йил бошидан бери энг кўп — 620 мингтага кескин кўпайган. Бу Ўзбекистон бўйича янги ўқув йили бошлангани билан изоҳланади. Йил бошидан бери 4,7 млн дона банк картаси муомалага киритилган.

Ўтган ойда банклар ва тўлов ташкилотлари томонидан ўрнатилган банкомат ва инфокиосклар сони 19,3 мингтани ташкил этган. 

Бундан ташқари тўлов терминаллари орқали тушган тушумлар 14,9 трлн сўм бўлган. Бу кўрсаткич йил бошидан бери 122,2 трлн сўмдан кўпроқни ташкил қилмоқда.

Муомалага карталар чиқариш бўйича банклар орасида 6,2 млн дона карта билан «Халқ банки» етакчилик қилмоқда.

Иккинчи ўринни 3,8 млн банк картаси билан «Агробанк» эгаллаган бўлса, 3 млн кўрсаткич билан «Ипотека банк» учинчи бўлди. 

Банкомат ва инфокиосклар ўрнатиш бўйича «Kapitalbank» «Агробанк»ни ортда қолдириб биринчи ўринга чиқиб олди — 2 098 та. «Агробанк»да бу борада атиги 1 дона банкомат камроқ ва иккинчи ўринда.