Shimoliy Koreya Janubiy Koreya yaqinidagi suv hududlarga artilleriya snaryadlarini uchirdi, deb xabar bermoqda Deutsche Welle.
Janubiy Koreya Bosh shtab boshliqlari qo‘mitasining ma’lum qilishicha, Shimoliy Koreya harbiylari jami 250 ga yaqin artilleriya snaryadlarini otgan.
Seul harbiylari snaryadlar Janubiy Koreya hududiy suvlariga tushmagani, balki KXDR va Janubiy Koreyani ajratib turuvchi bufer zonalarga tushganini aytdi. Ular buni 2018-yilgi harbiy kelishuvning “ochiq buzilishi” deb atadi. O‘sha yilgi kelishuvga muvofiq ikki davlat o‘rtasidagi keskinlikni kamaytirish uchun quruqlik va dengiz chegaralari bo‘ylab ushbu bufer zonalari yaratilgan edi.
Birozdan so‘ng Shimoliy Koreya bu o‘qlar Janubiy Koreya tomonidan o‘nlab artilleriya snaryadlari otilganiga javoban “jiddiy ogohlantirish” bo‘lgani haqida bayonot berdi.
Shu hafta Janubiy Koreya kuchlari Shimoliy Koreyaning yadroviy va raketa tahdidlariga qarshi kurashish samaradorligini oshirishga qaratilgan yillik “Xoguk” mudofaa mashg‘ulotlarini boshladi. 22-oktabrgacha davom etadigan mashg‘ulotlar Shimoliy Koreya qurol sinovlarini kuchaytirayotgan paytga to‘g‘ri kelmoqda.
Janubiy Koreya qonunchilari Shimol 2017-yildan beri birinchi yadroviy sinovga tayyorgarlikni yakunlagani va sinovni AQSHda 8-noyabr kuni bo‘lib o‘tadigan oraliq saylovlar oldidan o‘tkazishi mumkinligini aytgan.
Izoh (0)