Madagaskar prezidenti tashqi ishlar vazirini BMTda Rossiyaga qarshi ovoz bergani uchun ishdan bo‘shatdi

Madagaskar prezidenti Endri Raxoyelina tashqi ishlar vaziri Richard Randriamandranatoni mamlakat BMTda Ukraina sharqidagi referendumlarni qoralab ovoz bergani uchun ishdan bo‘shatdi, deb yozadi “RBK”.

Tashqi ishlar vaziri BMT Bosh assambleyasida ovoz berish bo‘yicha Madagaskar hukumati bilan maslahatlashmagan. Prezident Raxoyelina ta’kidlashicha, mamlakat an’anaviy tarzda betaraflikni saqlaydi va Madagaskar ovoz berishda betaraf qolishi kerak edi.

Ayni vaqtda sobiq vazir ovoz berish Madagaskarning milliy manfaatlariga hech qanaqasiga zarar yetkazmaganini aytdi.

BMT Bosh assambleyasi Donetsk va Lugansk xalq respublikalarida hamda bosib olingan Xerson va Zaporojye viloyatlarida Rossiya tomonidan o‘tkazilgan “referendumlar”ni qoralovchi rezolyutsiyani 12-oktabr kuni qabul qildi.

BMTga a’zo 193 ta mamlakatdan 143 tasi rezolyutsiyani yoqlab ovoz berdi. Beshta mamlakat — Belarus, Shimoliy Koreya, Nikaragua, Suriya va Rossiya qarshi chiqdi. Ovoz berishda 35 ta davlat betaraf qoldi, ular orasida Xitoy, Hindiston, O‘zbekiston, Qirg‘iziston, Qozog‘iston va Tojikiston ham bor. Yana o‘nta davlat esa ovoz berishda qatnashmadi.

BMT Bosh assambleyasi rezolyutsiyalari Xavfsizlik kengashi qarorlaridan farqli o‘laroq, deklarativ (e’lon qilinuvchi) hujjatlar hisoblanadi.