КХДР Жанубий Корея билан чегара яқинига артиллерия снарядларини учирди

Шимолий Корея Жанубий Корея яқинидаги сув ҳудудларга артиллерия снарядларини учирди, деб хабар бермоқда Deutsche Welle.

Жанубий Корея Бош штаб бошлиқлари қўмитасининг маълум қилишича, Шимолий Корея ҳарбийлари жами 250 га яқин артиллерия снарядларини отган.

Сеул ҳарбийлари снарядлар Жанубий Корея ҳудудий сувларига тушмагани, балки КХДР ва Жанубий Кореяни ажратиб турувчи буфер зоналарга тушганини айтди. Улар буни  2018 йилги ҳарбий келишувнинг «очиқ бузилиши» деб атади. Ўша йилги келишувга мувофиқ икки давлат ўртасидаги кескинликни камайтириш учун қуруқлик ва денгиз чегаралари бўйлаб ушбу буфер зоналари яратилган эди.

Бироздан сўнг Шимолий Корея бу ўқлар Жанубий Корея томонидан ўнлаб артиллерия снарядлари отилганига жавобан «жиддий огоҳлантириш» бўлгани ҳақида баёнот берди.

Шу ҳафта Жанубий Корея кучлари Шимолий Кореянинг ядровий ва ракета таҳдидларига қарши курашиш самарадорлигини оширишга қаратилган йиллик «Хогук» мудофаа машғулотларини бошлади. 22 октябргача давом этадиган машғулотлар Шимолий Корея қурол синовларини кучайтираётган пайтга тўғри келмоқда.

Жанубий Корея қонунчилари Шимол 2017 йилдан бери биринчи ядровий синовга тайёргарликни якунлагани ва синовни АҚШда 8 ноябрь куни бўлиб ўтадиган оралиқ сайловлар олдидан ўтказиши мумкинлигини айтган.