Farg‘ona viloyati Uchko‘prik tumanida fermerlar hokimiyat binosiga chaqirilib, o‘z yerlaridan ixtiyoriy voz kechish yuzasidan ariza rasmiylashtirilgani aniqlangandi. Viloyat hokimligi holat yuzasidan munosabat bildirdi.
Ta’kidlanishicha, 13-oktabr kuni Uchko‘prik tumanida fermerlar yer ijara shartnomalari bekor qilinishini so‘rab ariza yozishi bilan bog‘liq holat viloyat hokimligi hamda viloyat prokuraturasi hamkorligida to‘liq o‘rganib chiqildi.
O‘rganish natijasida materialda keltirilgan iddaolar o‘z tasdig‘ini topmadi. Biroq fermerlarning shartnoma hamda reja hajmlari bo‘yicha e’tirozlari o‘rganilganda bu borada qator kamchiliklarga yo‘l qo‘yilgani ma’lum bo‘ldi. Tuman hokimining paxta yetishtirish va sotish hajmlarini belgilash haqidagi qarorlari va ilovalari ba’zi holatlarda fermer xo‘jaliklari e’tiboriga yetkazilmagani, ba’zi holatlarda paxta yetishtirish bo‘yicha hosildorlik ko‘rsatkichlari mutaxassislar xulosalariga asoslanilmagan va yer egalarining fikrlari hisobga olinmagan holda belgilab yuborilgani, shartnomalarni rasmiylashtirish va ro‘yxatga olish ishlarining tegishli nizom talablariga muvofiq yuritishi to‘la ta’minlanmagani kabi holatlar aniqlandi. Yuqoridagi holatlar tumanda fermer xo‘jaliklarining ijtimoiy tarmoqlar orqali noroziligiga sabab bo‘lgan, — deyiladi hokimlik xabarida.Qayd etilishicha, fermerlarning mahalliy hokimlik, davlat organlari hamda klaster korxonasiga nisbatan ishonchsizligiga sabab bo‘layotgan omillarni o‘z vaqtida bartaraf etib borish chorasini ko‘rmagan tuman hokimi o‘rinbosari D.Qurbonov, tuman qishloq xo‘jaligi bo‘limi boshlig‘i o‘rinbosari M.Rahmonov, fermer, dehqon xo‘jaliklari va tomorqa yer egalari tuman kengashi mutaxassisi Y.Mamatqulov intizomiy javobgarlikka tortildi.
Shuningdek, xizmat vazifalarini lozim darajada bajarmay, fermerlarning noroziligiga sababchi bo‘lgan tuman hokimi Abror Asqarovga nisbatan “hayfsan” jazosi qo‘llanadigan bo‘ldi.
Qolgan sektor rahbarlari — tuman prokurori O‘ktamali Yulchiyev, tuman IIB boshlig‘i Akmal Sotiboldiyev va tuman DSI boshlig‘i Usmonali Ahmadaliyevning xatti-harakatlari bo‘yicha xizmat tekshiruvi tayinlandi. Ularning xatti-harakatiga xizmat tekshiruvi natijasi bo‘yicha qonuniy baho beriladi.
Izoh (0)