Andijon hokimi va vazir mojarosiga sabab bo‘lgan farmkompaniya rahbari viloyat SSBga boshliq bo‘ldi. Jamoatchilik buni muhokama qilmoqda

Andijon viloyati sog‘liqni saqlash boshqarmasiga tadbirkor-farmatsevt Jur’atbek Quvvatov rahbar etib tayinlangani haqida xabar berilgandi. Ushbu tayinlovdan so‘ng “Davletovuz” masalaning boshqa tomoni bor ekani haqida post qoldirdi. Viloyat hokimligi, o‘z navbatida, vaziyat yuzasidan tushuntirish berdi.

Telegram’dagi “Davletovuz” kanali asoschisi Qobil Xidirov, xususan, shunday yozgan.

Bu yerda boshqa masala ham bor. “Makro Farm Andijan” MCHJga Andijon viloyati hokimining nazari tushgan. Har doim qo‘llab-quvvatlab keladi. Masalan, 2019-yilda majlis qilib, protokol chiqartiradi. Unga ko‘ra, viloyatdagi tibbiyot muassasalaridan pullar yig‘ib olinib, viloyat sog‘liqni saqlash boshqarmasi hisob raqamiga markazlashtirish hamda ushbu pul mablag‘lariga to‘g‘ridan to‘g‘ri tuzilgan shartnomalarga muvofiq, shpris, infuzion sistema va tibbiy qo‘lqoplar sotib olish topshirilgan.

Topshiriq asosida “Makro Farm Andijan” MCHJ bilan qonun talablariga zid ravishda tuzilgan to‘g‘ridan to‘g‘ri shartnomalar asosida jami 6,3 mlrd so‘mlik muvofiqlik sertifikati mavjud bo‘lmagan shpris va sistemalar sotib olingan.

Andijon viloyatida 2018—2019-yillarda shpris, sistema va qo‘lqoplar bilan ta’minot darajasi zarur ehtiyojdan bir necha marotaba ortiqqa ta’minlangan, lekin shoshilinch yordam uchun kerakli bo‘lgan va boshqa dori vositalari ehtiyojga nisbatan bir necha marotaba kam xarid qilingan. Shu va boshqa masalalarni deb 2019-yilda Sog‘liqni saqlash vazirligi Bosh prokuraturaga murojaat qilgan, keyin Andijon viloyatining haqoratli so‘zlarga to‘la audiosi tarqalgan edi. O‘zi umuman, viloyat hokimining suyukli farmkompaniyalari karantin payti ham ancha maza qilishgan edi, — deydi u.

Viloyat hokimligi esa vaziyat bo‘yicha rasmiy munosabat berdi.

Haqiqatan ham, Andijon viloyati sog‘liqni saqlash boshqarmasiga tayinlangan rahbar J.Quvvatov tibbiyot va farmatsevtika sohasini rivojlantirishda Andijonda o‘rnak bo‘ladigan ishlarni amalga oshirishda faol bo‘lgan. Bundan tashqari, Andijonda insulin, shpris va boshqa turdagi dori-darmonlarni ishlab chiqarishni mahalliylashtirish ishlarini amalga oshirgan, shuningdek, ko‘plab chet ellik investorlarni jalb etgan.

Shuningdek, Andijon viloyatida namuna bo‘la oladigan xususiy tibbiyot muassasalarni rivojlantirish yuzasidan salmoqli ishlarni amalga oshirgan. Shuni ta’kidlash joizki, tibbiyot va farmatsevtika yo‘nalishi bo‘yicha Andijon viloyatida eng ko‘p ishchi o‘rinlar yaratgan tadbirkor sifatida O‘zbekiston Respublikasi prezidentining alohida rahmatnomasiga sazovor bo‘lgan.

Maqolaga e’tibor qaratilganida, Andijonda mahalliy ishlab chiqarishni rivojlantirish, arzon narxlarda taqdim etilgan dori-darmon, tibbiy jihozlarni ishlab chiqaruvchilarni qo‘llab-quvvatlash jarayonlari noto‘g‘ri talqin etilgan. Andijon viloyati sog‘liqni saqlash boshqarmasi rahbarining tibbiyot va farmatsevtika sohasidagi tajribasi tibbiyotni rivojlantirilishiga muhim ahamiyat kasb etishiga shubha yo‘q.

Bundan tashqari, sohaga yangi rahbar sog‘liqni saqlash vazirining buyrug‘iga asosan tayinlangani sir emas. Dunyoda ko‘plab sohalar kabi tibbiyot sohasida ham tajribali menejerlarning boshqaruvi o‘z samarasini bergani hammamizga ayon. Tibbiyot va farmatsevtika sohasini yanada rivojlantirishga hissa qo‘shgan shaxsning tizimga rahbarlik lavozimiga tayinlanishi ham Andijon viloyatida sog‘liqni saqlash tizimini yanada rivojlantirishda xizmat qiladi.

Shu o‘rinda viloyat hokimi tadbirkorlik faoliyatini qo‘llab-quvvatlashi noto‘g‘ri talqin qilinmasligini so‘rab qolamiz, — deyiladi munosabatda.

Ma’lumot o‘rnida, Jur’atbek Quvvatov 1986-yil Andijon shahrida tug‘ilgan, 2008-yilda Toshkent farmatsevtika institutini tamomlagan. Ish faoliyatini “Zamin baraka imkoni” mas’uliyati cheklangan jamiyati dorixona mudirligidan boshlagan. Turli yillarda dori vositalari ekspertizasi va standartizatsiyasi davlat markazi Andijon viloyati bo‘limi sertifikatlashtirish bo‘yicha eksperti, Andijon dori vositalari tibbiy buyumlar va tibbiy texnika ekspertizasi va standartlashtirib sho‘ba korxonasi direktori vazifalarida faoliyat olib borgan. 2018-yildan buyon “Andijonfarm erkin iqtisodiy zonasi” direksiyasi rahbari lavozimida ishlab kelayotgan edi.

U viloyatdagi yirik farmatsevt tadbirkorlardan biri bo‘lib, ayni paytda “Makro farm academy” nodavlat ta’lim muassasasi, “Makro farm al-sansar” qo‘shma korxonasi, mevali daraxtlar, butalar va yong‘oqlarning boshqa turlarini yetishtirishga ixtisoslashtirilgan “Makro texnoagro biznes” fermer xo‘jaligi, tibbiy va stomatologiya asboblari va jihozlari ishlab chiqaruvchi “Makro Farm Andijan” MCHJ ta’sischisi hisoblanadi. Bundan tashqari 2020-yildan buyon “Andijon” futbol klubiga ham egalik qilib kelmoqda.

2020-yilning dekabr oyidan buyon viloyat Sog‘liqni saqlash boshqarmasiga rahbarlik qilib kelayotgan Salohiddin Yusupov salomatligi tufayli o‘z xohishiga ko‘ra lavozimidan ozod etilgani, uning o‘rniga boshqarma boshlig‘i vazifasini vaqtincha bajarish avval shu lavozimda ishlagan Qudrat Yarqulov tayinlangani haqida xabar berilgandi.