Фарғона вилояти Учкўприк туманида фермерлар ҳокимият биносига чақирилиб, ўз ерларидан ихтиёрий воз кечиш юзасидан ариза расмийлаштирилгани аниқланганди. Вилоят ҳокимлиги ҳолат юзасидан муносабат билдирди.
Таъкидланишича, 13 октябрь куни Учкўприк туманида фермерлар ер ижара шартномалари бекор қилинишини сўраб ариза ёзиши билан боғлиқ ҳолат вилоят ҳокимлиги ҳамда вилоят прокуратураси ҳамкорлигида тўлиқ ўрганиб чиқилди.
Ўрганиш натижасида материалда келтирилган иддаолар ўз тасдиғини топмади. Бироқ фермерларнинг шартнома ҳамда режа ҳажмлари бўйича эътирозлари ўрганилганда бу борада қатор камчиликларга йўл қўйилгани маълум бўлди. Туман ҳокимининг пахта етиштириш ва сотиш ҳажмларини белгилаш ҳақидаги қарорлари ва иловалари баъзи ҳолатларда фермер хўжаликлари эътиборига етказилмагани, баъзи ҳолатларда пахта етиштириш бўйича ҳосилдорлик кўрсаткичлари мутахассислар хулосаларига асосланилмаган ва ер эгаларининг фикрлари ҳисобга олинмаган ҳолда белгилаб юборилгани, шартномаларни расмийлаштириш ва рўйхатга олиш ишларининг тегишли низом талабларига мувофиқ юритиши тўла таъминланмагани каби ҳолатлар аниқланди. Юқоридаги ҳолатлар туманда фермер хўжаликларининг ижтимоий тармоқлар орқали норозилигига сабаб бўлган, — дейилади ҳокимлик хабарида.Қайд этилишича, фермерларнинг маҳаллий ҳокимлик, давлат органлари ҳамда кластер корхонасига нисбатан ишончсизлигига сабаб бўлаётган омилларни ўз вақтида бартараф этиб бориш чорасини кўрмаган туман ҳокими ўринбосари Д.Қурбонов, туман қишлоқ хўжалиги бўлими бошлиғи ўринбосари М.Раҳмонов, фермер, деҳқон хўжаликлари ва томорқа ер эгалари туман кенгаши мутахассиси Й.Маматқулов интизомий жавобгарликка тортилди.
Шунингдек, хизмат вазифаларини лозим даражада бажармай, фермерларнинг норозилигига сабабчи бўлган туман ҳокими Аброр Асқаровга нисбатан «ҳайфсан» жазоси қўлланадиган бўлди.
Қолган сектор раҳбарлари — туман прокурори Ўктамали Юлчиев, туман ИИБ бошлиғи Акмал Сотиболдиев ва туман ДSI бошлиғи Усмонали Аҳмадалиевнинг хатти-ҳаракатлари бўйича хизмат текшируви тайинланди. Уларнинг хатти-ҳаракатига хизмат текшируви натижаси бўйича қонуний баҳо берилади.
Изоҳ (0)