Rossiya tomonidan anneksiya qilingan Zaporojye viloyatining Energodar shahri 19-oktabrga o‘tar kechasi HIMARS yoppasiga o‘t ochuvchi reaktiv tizimlari bilan o‘qqa tutildi. Bu haqda shahar hokimiyati vakili ma’lum qildi.
Zarbalar shahar ma’muriyati, Energodarga kiraverishdagi ko‘prik va “Luch” podstansiyasiga teggan. Aytishlaricha, podstansiyaga zarbadan keyin Energodar butunlay elektrsiz qolgan.
Anneksiya qilingan Zaporojye viloyati hokimiyati vakili Vladimir Rogov “RIA Novosti” agentligiga Ukraina harbiylari tunda Energodardagi Zaporojye atom elektr stansiyasini egallab olishga uringani haqida ma’lum qildi.
Uning da’vo qilishicha, 19-oktabrga o‘tar kechasi Ukraina kuchlari nazorati ostidagi Zaporojye shahri va boshqa yo‘nalishlardan desant kemalarining katta guruhi va yuk ortilgan katta kema yo‘lga chiqqan. Energodar o‘qqa tutilganidan so‘ng, Vladimir Rogovning so‘zlariga ko‘ra, Ukraina desant qo‘shinlari 30 dan ortiq qayiqda kelib, AESni qo‘lga kiritish uchun langar tashlashga uringan.
“Janglar bir necha soat, kamida uch-uch yarim soat davom etdi. Ularning qayiqdan tushishga urinishlari qaytarildi”, — deydi Rogov.
Rossiya Mudofaa vazirligi va Ukraina Qurolli kuchlari bosh shtabi bu ma’lumotlarga hali izoh bermadi.
Rossiya avval ham Ukrainani desant kuchlari yordamida ZAESni egallab olishga urinayotganlikda ayblagan.
Izoh (0)