Қорақалпоғистоннинг Нукус туманида бўлиб ўтган тўйда автомобиль салонидан танасини чиқарган ҳолда тўй кортежини тасвирга олган операторлар ва автомобиль ҳайдовчиси жаримага тортилди. Бу ҳақда «Дарё»га Қорақалпоғистон ЙҲХБ ахборот хизмати раҳбари Турсинбай Ўтемуратов хабар берди.
Маълум бўлишича, воқеа видеоси ижтимоий тармоқларда тарқалгач, масъуллар ҳолат ҳақида суриштириб, вазиятга ойдинлик киритган.
Бошқарма ахборот хизмати раҳбари Турсинбай Ўтемуратовнинг «Дарё» мухбирига маълум қилишича, воқеа шу йилнинг 18 июнь куни Нукус туманида юз берган.
Видеода акс этган ҳолат иштирокчиси Nexia-3 ҳайдовчиси ва тасвирга олувчи шахслар жавобгарликка тортилган. Машинанинг ўзи эса Чимбой туманидаги жарима майдончасига жойлаштирилган.
Йўл ҳаракати хавфсизлиги хизматининг огоҳлантиришича, транспорт воситаси ҳаракатланаётган вақтда йўловчи томонидан тана қисмларини (қўлдан ташқари) салондан чиқариш базавий ҳисоблаш миқдорининг бир баравари миқдорида жарима солишга сабаб бўлади.
Изоҳ (0)