Bryansk va Kurskdagi bir nechta qishloq o‘qqa tutildi

Ukraina Qurolli kuchlari hozirda Bryansk viloyati Trubchevskiy tumani Belaya Beryozka qishlog‘ini o‘qqa tutmoqda. Bu haqda 18-oktabr kuni viloyat gubernatori Aleksandr Bogomaz o‘zining Telegram’dagi kanalida ma’lum qildi.

Unga ko‘ra, Ukraina hududidan otilgan snaryadlar Belaya Beryozka qishlog‘idagi ikkita turar-joy binosiga tushgan. Dastlabki ma’lumotlarga ko‘ra, qurbonlar yo‘q. Voqea joyida Favqulodda vaziyatlar vazirligi va tezkor xizmatlar vakillari ishlamoqda.

Shu bilan birga, Kursk viloyatida Guyevo va Goncharovka qishloqlari, shuningdek, Sudja shahrining chekka hududlari o‘qqa tutilmoqda. Viloyat gubernatori Roman Starovoitning ma’lum qilishicha, bugun Ukraina Qurolli kuchlari Sudjanskiy tumanining chegaradagi qishloqlarini bombardimon qilmoqda.

Guyevoda turar joy va omborxonaga shikast yetgan. Goncharovkada bir qancha uylarning tomi va fasadlari shikastlangan.

Avvalroq Belgorod va Kursk viloyatlari rahbarlari bir necha qishloqlarning o‘qqa tutilishi haqida xabar berilgan edi. 18-oktabr kuni Belgorod viloyatida temiryo‘llarning aloqa liniyasi, Kursk viloyatida esa elektr uzatish liniyalari vayron qilingan.