Андижон ҳокими ва вазир можаросига сабаб бўлган фармкомпания раҳбари вилоят ССБга бошлиқ бўлди. Жамоатчилик буни муҳокама қилмоқда

Андижон вилояти соғлиқни сақлаш бошқармасига тадбиркор-фармацевт Журъатбек Қувватов раҳбар этиб тайинлангани ҳақида хабар берилганди. Ушбу тайинловдан сўнг «Давлетовуз» масаланинг бошқа томони бор экани ҳақида пост қолдирди. Вилоят ҳокимлиги, ўз навбатида, вазият юзасидан тушунтириш берди.

Telegram’даги «Давлетовуз» канали асосчиси Қобил Хидиров, хусусан, шундай ёзган.

Бу ерда бошқа масала ҳам бор. «Маkro Farm Andijan» МЧЖга Андижон вилояти ҳокимининг назари тушган. Ҳар доим қўллаб-қувватлаб келади. Масалан, 2019 йилда мажлис қилиб, протокол чиқартиради. Унга кўра, вилоятдаги тиббиёт муассасаларидан пуллар йиғиб олиниб, вилоят соғлиқни сақлаш бошқармаси ҳисоб рақамига марказлаштириш ҳамда ушбу пул маблағларига тўғридан-тўғри тузилган шартномаларга мувофиқ, шприц, инфузион система ва тиббий қўлқоплар сотиб олиш топширилган.

Топшириқ асосида «Маkro Farm Andijan» МЧЖ билан қонун талабларига зид равишда тузилган тўғридан-тўғри шартномалар асосида жами 6,3 млрд сўмлик мувофиқлик сертификати мавжуд бўлмаган шприц ва системалар сотиб олинган.

Андижон вилоятида 2018—2019 йилларда шприц, система ва қўлқоплар билан таъминот даражаси зарур эҳтиёждан бир неча маротаба ортиққа таъминланган, лекин шошилинч ёрдам учун керакли бўлган ва бошқа дори воситалари эҳтиёжга нисбатан бир неча маротаба кам харид қилинган. Шу ва бошқа масалаларни деб 2019 йилда Соғлиқни сақлаш вазирлиги Бош прокуратурага мурожаат қилган, кейин Андижон вилоятининг ҳақоратли сўзларга тўла аудиоси тарқалган эди. Ўзи умуман, вилоят ҳокимининг суюкли фармкомпаниялари карантин пайти ҳам анча маза қилишган эди, — дейди у.

Вилоят ҳокимлиги эса вазият бўйича расмий муносабат берди.

Ҳақиқатан ҳам, Андижон вилояти соғлиқни сақлаш бошқармасига тайинланган раҳбар Ж.Қувватов тиббиёт ва фармацевтика соҳасини ривожлантиришда Андижонда ўрнак бўладиган ишларни амалга оширишда фаол бўлган. Бундан ташқари, Андижонда инсулин, шприц ва бошқа турдаги дори-дармонларни ишлаб чиқаришни маҳаллийлаштириш ишларини амалга оширган, шунингдек, кўплаб чет эллик инвесторларни жалб этган.

Шунингдек, Андижон вилоятида намуна бўла оладиган хусусий тиббиёт муассасаларни ривожлантириш юзасидан салмоқли ишларни амалга оширган. Шуни таъкидлаш жоизки, тиббиёт ва фармацевтика йўналиши бўйича Андижон вилоятида энг кўп ишчи ўринлар яратган тадбиркор сифатида Ўзбекистон Республикаси президентининг алоҳида раҳматномасига сазовор бўлган.

Мақолага эътибор қаратилганида, Андижонда маҳаллий ишлаб чиқаришни ривожлантириш, арзон нархларда тақдим этилган дори-дармон, тиббий жиҳозларни ишлаб чиқарувчиларни қўллаб-қувватлаш жараёнлари нотўғри талқин этилган. Андижон вилояти соғлиқни сақлаш бошқармаси раҳбарининг тиббиёт ва фармацевтика соҳасидаги тажрибаси тиббиётни ривожлантирилишига муҳим аҳамият касб этишига шубҳа йўқ.

Бундан ташқари, соҳага янги раҳбар соғлиқни сақлаш вазирининг буйруғига асосан тайинлангани сир эмас. Дунёда кўплаб соҳалар каби тиббиёт соҳасида ҳам тажрибали менежерларнинг бошқаруви ўз самарасини бергани ҳаммамизга аён. Тиббиёт ва фармацевтика соҳасини янада ривожлантиришга ҳисса қўшган шахснинг тизимга раҳбарлик лавозимига тайинланиши ҳам Андижон вилоятида соғлиқни сақлаш тизимини янада ривожлантиришда хизмат қилади.

Шу ўринда вилоят ҳокими тадбиркорлик фаолиятини қўллаб-қувватлаши нотўғри талқин қилинмаслигини сўраб қоламиз, — дейилади муносабатда.

Маълумот ўрнида, Журъатбек Қувватов 1986 йил Андижон шаҳрида туғилган, 2008 йилда Тошкент фармацевтика институтини тамомлаган. Иш фаолиятини «Замин барака имкони» масъулияти чекланган жамияти дорихона мудирлигидан бошлаган. Турли йилларда дори воситалари экспертизаси ва стандартизацияси давлат маркази Андижон вилояти бўлими сертификатлаштириш бўйича эксперти, Андижон дори воситалари тиббий буюмлар ва тиббий техника экспертизаси ва стандартлаштириб шўъба корхонаси директори вазифаларида фаолият олиб борган. 2018 йилдан буён «Андижонфарм эркин иқтисодий зонаси» дирекцияси раҳбари лавозимида ишлаб келаётган эди.

У вилоятдаги йирик фармацевт тадбиркорлардан бири бўлиб, айни пайтда «Маkro farm academy» нодавлат таълим муассасаси, «Маkro farm al-sansar» қўшма корхонаси, мевали дарахтлар, буталар ва ёнғоқларнинг бошқа турларини етиштиришга ихтисослаштирилган «Макро техноагро бизнес» фермер хўжалиги, тиббий ва стоматология асбоблари ва жиҳозлари ишлаб чиқарувчи «Маkro Farm Andijan» МЧЖ таъсисчиси ҳисобланади. Бундан ташқари 2020 йилдан буён «Андижон» футбол клубига ҳам эгалик қилиб келмоқда.

2020 йилнинг декабрь ойидан буён вилоят Соғлиқни сақлаш бошқармасига раҳбарлик қилиб келаётган Салоҳиддин Юсупов саломатлиги туфайли ўз хоҳишига кўра лавозимидан озод этилгани, унинг ўрнига бошқарма бошлиғи вазифасини вақтинча бажариш аввал шу лавозимда ишлаган Қудрат Ярқулов тайинлангани ҳақида хабар берилганди.