2022-yilda anjir O‘zbekiston meva segmentidagi eksport bo‘yicha yetakchi o‘rinlardan birini egalladi. Joriy mavsumda anjir eksporti o‘tgan besh yil davomidagi eksport hajmidan 7 barobar oshdi. Bu haqda EastFruit xabar bermoqda.
Joriy mavsumda ushbu mahsulot eksportining qariyb 97 foizi Qozog‘iston hissasiga to‘g‘ri keldi.
O‘zbekistondan 2022-yilda anjir eksporti mavsumi iyun oyining ikkinchi o‘n kunligida, o‘tgan yilga nisbatan taxminan bir hafta-o‘n kun avval boshlandi. Mavsum sentyabr oyining ikkinchi o‘n kunligida, deyarli o‘tgan yilgi davr bilan bir xil yakunlandi.
Dastlabki rasmiy statistik ma’lumotlarga ko‘ra, 2022-yilning iyun oyi boshidan sentyabr oyi oxiriga qadar O‘zbekiston jami 7,2 ming tonna va qiymati 1,9 million dollarlik anjir eksport qilgan, bu esa tarixiy rekord hisoblanadi.
O‘tgan bir necha yil ichida ushbu mahsulotning yillik eksport hajmi 370 tonnadan oshmagan, yillik eksport tushumi esa 410 ming dollardan kam bo‘lgan.
O‘tgan besh yil davomida ya’ni 2017-yil boshidan 2021-yil yakuniga qadar anjir eksportining umumiy hajmi ming tonnani, mazkur “besh yillik” eksport tushumining umumiy miqdori esa 912 ming dollarni tashkil qilgan.
Bozor ishtirokchilarining fikricha, ushbu mahsulot eksporti hajmining bu qadar keskin oshishida asosiy omillardan biri 2022-yilgi mavsumda O‘zbekistondagi yuqori hosil va natijada ushbu mahsulot narxining keskin pasayganligidir.
Bu holat eksportyorlarga o‘zbek anjirini tashqi bozorlarga o‘tgan yillardagidan ancha arzon narxlarda taklif qilish imkonini berdi.
Agar O‘zbekiston tashqi savdosi statistikasidan kelib chiqqan holda, anjirning o‘rtacha eksport narxi hisoblansa, joriy mavsumda u 2017—2022-yillar uchun eng past ko‘rsatkichda bo‘ldi.
2022-yilda O‘zbekiston anjirining o‘rtacha eksport narxi o‘tgan besh yilgi ko‘rsatkichlarga nisbatan kamida 2,3 barobar, o‘rta hisobda esa 3,5 barobar past bo‘lgan.
Shunday qilib, 2022-yilda anjir eksporti 2017—2021 -yillardagi umumiy hajmdan 7,1 barobar, joriy mavsumda eksportdan tushgan tushum miqdori esa ushbu besh yillik umumiy tushumdan 2,1 barobar ko‘p bo‘ldi.
Taxminan 1-2 tonnalik kichik partiyalarni istisno qilinsa, 2022-yilda deyarli butun hajm YEOII mamlakatlari bozorlariga jo‘natildi, asosiy ulush Qozog‘istonga to‘g‘ri keladi — 96,8 foiz. Qolgan qism Rossiya bozoriga (2,3 foizi) va Qirg‘izistonga (0,8 foizi) yetkazib berildi.
Izoh (0)