Jahon iqtisodiyotidagi muammolar dollar kursining kuchayishi bilan emas, balki alohida mamlakatlarda iqtisodiy o‘sishning yo‘qligi bilan bog‘liq. Bu haqda AQSH prezidenti Jo Baydenning intervyusiga tayanib, “RBK” xabar bermoqda.
Men dollarning mustahkamlanishidan xavotirda emasman. Muammo boshqa mamlakatlarda iqtisodiy o‘sish va oqilona siyosatning yo‘qligida, — dedi Bayden.
U boshqa mamlakatlarda inflyatsiya bilan bog‘liq vaziyat AQSHdagidan yomonroq, deb hisoblashini ta’kidladi.
AQSH Federal Mehnat statistikasi byurosi ma’lumotlariga ko‘ra, sentyabr oyida inflyatsiya yillik hisobda 8,2 foiz bo‘lgan.
Avvalroq Xalqaro valyuta fondi (XVF) dollar kursining kuchayishi dunyoning deyarli barcha mamlakatlariga salbiy ta’sir ko‘rsatishi haqidagi xulosalarini taqdim etgandi.
Dollar 2000-yildan beri eng yuqori ko‘rsatkichga yetdi va yil boshidan buyon iyenaga nisbatan 22 foizga, yevroga nisbatan 13 foizga va rivojlanayotgan bozor valyutalariga nisbatan 6 foizga oshdi.
Bu deyarli barcha mamlakatlar uchun muhim makroiqtisodiy ta’sirga ega, chunki dollar xalqaro savdoda eng ko‘p qo‘llaniladigan valyutadir, — dedi Xalqaro valyuta fondi.
XVF ma’lumotlariga ko‘ra, 2000-yildan beri AQSHning jahon tovar eksportidagi ulushi 12 foizdan 8 foizga tushgan bo‘lsa, dollarning jahon eksportidagi ulushi qariyb 40 foizni tashkil etadi. Ko‘pgina mamlakatlar uchun bu o‘sib borayotgan inflyatsiyaga qarshi kurashni qiyinlashtirdi.
Dollar kursining kuchayishi Rossiyadan bir qator tovarlar importiga qarshi sanksiyalar fonida yuzaga kelgan energetika inqirozi bilan bog‘liq.
Izoh (0)