Bugun, 17-oktabr kuni Xalq deputatlari Farg‘ona tumani kengashining navbatdan tashqari sessiyasi bo‘lib o‘tdi, deb xabar bermoqda “Daryo” muxbiri Azizjon Ermatov.
Sessiyada tashkiliy masala ko‘rilib, Inomov Hamidullo Tojiyevich Farg‘ona tumani hokimi lavozimiga tasdiqlangan.
Ma’lum qilinishicha, sessiya ishida viloyat hokimi Xayrulla Bozorov, tuman kengashi deputatlari, hokim o‘rinbosarlari, sektorlar, boshqarma va tashkilot rahbarlari, mahalla raislari, jamoatchilik faollari, OAV vakillari ishtirok etgan.
Sessiyada Xayrulla Bozorov shu kunga qadar O‘zbekiston Respublikasi Prezidenti huzuridagi Davlat xizmatini rivojlantirish agentligi Kadrlar ma’muriyatchiligi departamenti davlat organlari va tashkilotlarida kadrlar ishini muvofiqlashtirish boshqarmasi bosh inspektori vazifasida ishlab kelgan Hamidulla Inomov nomzodini tuman hokimi lavozimiga tavsiya qilgan.
Tavsiya etilgan nomzod tuman kengashi deputatlari tomonidan bir ovozdan qo‘llab-quvvatlangan.
Ma’lumot uchun, Hamidullo Inomov 1982-yilda Farg‘ona viloyati Buvayda tumanida tug‘ilgan. Avvalroq Prezident administratsiyasi rahbari Sardor Umurzoqov boshchiligida 27-sentabr kuni bo‘lib o‘tgan videoselektor yig‘ilishda Farg‘ona tumani hokimi Shuhratjon Mo‘minov ishdan olingani haqida xabar berilgan edi.
Shuningdek, Sirdaryo viloyatining Sardoba tumaniga ham yangi hokim tayinlandi. Ayni kunga qadar O‘zbekiston Respublikasi suv xo‘jaligi vaziri o‘rinbosari lavozimida ishlab kelgan Akmal Arziyev sobiq hokim Abduazim Xidirov o‘rnida Sardoba tumani hokimi sifatida ish boshlagan.
Izoh (0)