Халқ депутатлари Пахтаобод туман Кенгашининг навбатдан ташқари ўттиз бешинчи сессиясида Фавқулодда вазиятлар вазирининг молиявий-иқтисодий ва моддий-техник таъминот масалалари бўйича ўринбосари Азизбек Латифжонов туманнинг янги раҳбари сифатида таништирилди. Бу ҳақда «Дарё» мухбири Умиджон Мамарасулов хабар бермоқда.
Пахтаобод туманига шу пайтгача расман Элёр Усмонов ҳокимлик қилиб келаётган эди. Усмонов 2022 йилнинг 18 февраль куни Пахтаобод тумани ҳокими этиб тайинланганди. У бунга қадар Марказий банкнинг Андижон вилояти бош бошқармаси бошлиғи вазифасида ишлаган.
Элёр Усмонов 27 сентябрь куни президент Администрацияси раҳбари Сардор Умурзоқов раислигида ўтказилган видеоселектор йиғилишида ноқонуний ва лавозимига мос келмайдиган хатти-ҳаракатлари сабабли ишдан бўшатилганди.
Янги ҳоким Азизбек Латифжонов 1977 йил вилоятнинг Избоскан туманида туғилган бўлиб, 1999 йилда Андижон муҳандислик-иқтисодиёт институтини (сиртқи), 2000 йилда эса Банк-молия аеадемиясини тугатган. Мутахассислиги бўйича иқтисодчи.
Иш фаолиятини 1994 йилда «Ўзбекистон саноат-қурилиш банки» очиқ акциядорлик тижорат банки Андижон вилояти бўлими пул алмаштириш шахобчаси кассирлигидан бошлаган. Турли йилларда ушбу банкнинг Андижон вилояти бўлими халқ хўжалиги тармоқларини кредитлаштириш ва таҳлил қилиш бўлими бошлиғи ўринбосари, қурилиш мажмуаси корхона ва ташкилотларига қарз бериш, капитал маблағларни молиялаштириш ва техник назорати бўлими бошлиғи, банкнинг Бунёдкор филиали бошқарувчиси вазифаларида ишлаган.
2007—2018 йиллар давомида Молия вазирлиги Инвестициялар бошқармаси ҳудудий капитал қурилиш дастурларини молиявий тартибга солиш бўлими бошлиғи, вазирликнинг инвестициялар бошқармаси бошлиғи ўринбосари, бошлиғи лавозимларида фаолият олиб борган.
2018 йилдан Фавқулодда вазиятлар вазирининг моддий-техника ва молия-иқтисодиёт бўйича ўринбосари вазифасида ишлаб келаётганди.
Мавзуга доир: Фарғона ва Сардоба туманларида янги ҳокимлар иш бошлади
Изоҳ (0)