Qashqadaryo hokimi Murodjon Azimov rahbarligidagi hokimlik soatida hokimning ikki nafar o‘rinbosari — Rustam Yo‘ldoshev va Akbar Eshonqulov ishdan olindi. Bu haqda viloyat hokimligi axborot xizmati rahbari Ahror Sodiqov ma’lumot berdi.
Aytilishicha, har ikki o‘rinbosar ham boshqa ishga o‘tishi munosabati bilan lavozimidan olingan. Ammo ularning qaysi lavozimda ish boshlashi hozircha noma’lum.
Qo‘shimcha qilinishicha, viloyat hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Rustam Yo‘ldoshev o‘rnida Anvar Qobilov ish boshlagan. U tayinlovga qadar prezident Administratsiyasi huzuridagi Iqtisodiy tadqiqotlar va islohotlar markazi Qashqadaryo viloyati filiali rahbari lavozimida ishlab kelgan.
Murodjon Azimovning qurilish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari lavozimida esa Murodulla Azizov ish boshlagan. Murodulla Azizov tayinlovga qadar “O‘zbekneftgaz” aksiyadorlik jamiyati tijorat departamenti boshlig‘i o‘rinbosari — marketing bo‘limi boshlig‘i lavozimida faoliyat yuritib kelayotgan edi.
“Daryo” manbasiga ko‘ra, sobiq o‘rinbosar Akbar Eshonqulov viloyatdagi boshqarmalarning birida ish boshlashi kutilmoqda.
Shuningdek, Chiroqchi tumani hokimi Nodir Erkayev fuqarolar murojaatlari bilan ishlashdagi kamchiliklari bois hayfsanga munosib ko‘rilgan.
Izoh (0)