Eronning Evin qamoqxonasida sodir bo‘lgan yong‘in va mushtlashuv oqibatida halok bo‘lganlar soni sakkiz kishiga yetdi. Bu haqda IRNA davlat axborot agentligi Eron sud hokimiyati matbuot xizmatiga tayanib, xabar berdi.
Avvalroq to‘rt qurbon haqida xabar berilgandi. O‘limlarga tutundan zaharlanish sabab bo‘lgan. 70 ga yaqin kishi jarohat olgan, ulardan olti nafari hali ham kasalxonada, ahvoli yaxshilanmoqda.
Tehrondagi qamoqxonada yong‘in 16-oktabr kuni kechqurun sodir bo‘lgan edi. U yerda mahbuslar mushtlashuv boshlab, tartibsizlik yuzaga keltirgan. Bu jarayonda ular tikuvchilik sexidagi kiyim-kechak omborini yoqib yuborishgan. Tasnim agentligi manbasining aytishicha, o‘g‘irlik va moliyaviy jinoyatlar uchun qamalgan mahkumlar o‘zaro mushtlashgan.
Fars agentligining xabar berishicha, qamoqxonadagi yong‘indan keyin portlashlar sodir bo‘lgan. Tehron gubernatori Mohsin Mansuriy mahbuslarni tarqatish uchun ko‘zni yoshlatuvchi gaz ishlatilganini aytdi.
Eron matbuoti Evin qamoqxonasini mamlakatdagi eng katta qamoqxona deb ataydi, u Tehronda joylashgan. Al Jazeera telekanalining yozishicha, axloq tuzatish muassasasida asosan siyosiy mahbuslar va ikki fuqarolikka ega eronliklar saqlanmoqda.
Izoh (0)