Эроннинг Эвин қамоқхонасида содир бўлган ёнғин ва муштлашув оқибатида ҳалок бўлганлар сони саккиз кишига етди. Бу ҳақда IRNA давлат ахборот агентлиги Эрон суд ҳокимияти матбуот хизматига таяниб, хабар берди.
Аввалроқ тўрт қурбон ҳақида хабар берилганди. Ўлимларга тутундан заҳарланиш сабаб бўлган. 70 га яқин киши жароҳат олган, улардан олти нафари ҳали ҳам касалхонада, аҳволи яхшиланмоқда.
Теҳрондаги қамоқхонада ёнғин 16 октябрь куни кечқурун содир бўлган эди. У ерда маҳбуслар муштлашув бошлаб, тартибсизлик юзага келтирган. Бу жараёнда улар тикувчилик цехидаги кийим-кечак омборини ёқиб юборишган. Tasnim агентлиги манбасининг айтишича, ўғирлик ва молиявий жиноятлар учун қамалган маҳкумлар ўзаро муштлашган.
Фарс агентлигининг хабар беришича, қамоқхонадаги ёнғиндан кейин портлашлар содир бўлган. Теҳрон губернатори Моҳсин Мансурий маҳбусларни тарқатиш учун кўзни ёшлатувчи газ ишлатилганини айтди.
Эрон матбуоти Эвин қамоқхонасини мамлакатдаги энг катта қамоқхона деб атайди, у Теҳронда жойлашган. Al Jazeera телеканалининг ёзишича, ахлоқ тузатиш муассасасида асосан сиёсий маҳбуслар ва икки фуқароликка эга эронликлар сақланмоқда.
Изоҳ (0)