Uganda prezidenti Yoveri Museveni mamlakatning markaziy qismidagi bir qancha hududlarda uch haftalik lokdaun joriy qildi. Bunga hozirga qadar 19 kishining hayotiga zomin bo‘lgan Ebola epidemiyasi sabab bo‘lmoqda, deb yozadi Daily Monitor.
Uganda bir necha haftadan beri Ebola virusining Sudan shtammi tarqalishiga qarshi kurashmoqda. Virus tarqalishini to‘xtatish uchun rasmiylar mamlakatning ayrim hududlarida qattiq choralar ko‘rdi va cheklovlar o‘rnatdi.
Ushbu hududlarga davlat va xususiy avtotransport vositalarining, jumladan, “boda-boda” — afrikancha taksi, ya’ni yo‘lovchi o‘rindig‘iga ega mototsikl yoki velosipedning kirishi cheklandi.
Mubende va Kasanda tumanlarida komendantlik soati joriy etildi. Barcha cherkovlar va ko‘ngilochar joylar yopildi. O‘lim sabablaridan qat’i nazar, barcha o‘liklarni dafn etish vazifasi maxsus guruhlar zimmasiga yuklandi.
Ugandada davlat xizmatlari shay holatga keltirildi, xavfli virus tarqalayotgan o‘choqlarga qo‘shimcha tez yordam mashinalari yuborildi.
Jahon sog‘liqni ssaqlash tashkiloti ma’lumotlariga ko‘ra, Ebolaning Sudan shtammiga qarshi vaksina yoki maxsus dorilar hozirda mavjud emas. Uni davolash uchun tez orada klinik sinovlari boshlanadigan preparatidan umid qilinmoqda.
Izoh (0)