Rossiya Ta’lim vazirligi o‘qituvchilardan maktablarda o‘quv jarayoni doirasida WhatsApp va boshqa xorijiy messenjerlardan foydalanmaslikni talab qildi, deb yozmoqda “Kommersant”.
Xabarovsk o‘lkasi va Kursk viloyati ma’muriyatining nashrga ma’lum qilishicha, hududlardagi o‘qituvchilarga “VK messenjeri”dan hamda VK va “Rostelekom” tomonidan birgalikda ishlab chiqilgan “Sferum” o‘quv platformasidan foydalanish tavsiya etilgan. Nijegorod viloyati ta’lim vazirligi esa maktab xodimlaridan WhatsApp, Viber, Skype va Google Drive kabi xizmatlardan voz kechish so‘ralganini ma’lum qildi.
“Cheklovlar maxfiy ma’lumotlarning sizib chiqib ketishi ehtimolini bartaraf etishga yordam beradi”, — deya izoh berdi muassasa.
Rossiya Ta’lim vazirligi jurnalistlarga hududlarga xorijiy messenjerlardan foydalanmaslik bo‘yicha tavsiyalar yuborilayotganini tasdiqladi, lekin ular faqat “Mening maktabim” davlat tizimi va uning tarkibiy qismlari bilan ishlaydiganlarga tegishli ekanini ta’kidladi.
Xorijiy messenjerlardan foydalanishni cheklash nafaqat o‘qituvchilar, balki ota-onalarga ham tavsiya etilmoqda, deb ma’lum qildi “Kommersant”ga bir qator viloyatlardagi ota-onalar. Nijnegorod viloyatida o‘qituvchilar ota-onalarga “xorijiy internet xizmatlaridan foydalanish imkoniyatidan voz kechishi” kerakligini aytmoqda va buni axborot xavfsizligi tahdidlari bilan oqlamoqda.
Sentabr oyida Rossiya hukumati va VK o‘rtasida “Mening maktabim” tizimini joriy qilish doirasida “VK Messenjer”, “VK Zvonokov” va “Pochta Mail.ru”dan foydalanishni nazarda tutuvchi shartnoma tuzilgan.
Iyun oyida hukumat Rossiya viloyatlari rahbarlariga VK tomonidan ishlab chiqilgan mahalliy messenjerni ishlatish bo‘yicha tavsiyalar yuborgan.
Izoh (0)