Eron prezidenti Ibrohim Raisiy AQSH va Jo Baydenni mamlakatda tartibsizlik qo‘zg‘atishda aybladi, deb xabar bermoqda IRNA.
Ibrohim Raisiy o‘z nutqida “Amerika prezidenti bayonotlari bilan Eronda terror, tartibsizlik va vayronagarchilikni qo‘zg‘atmoqda”, deb ta’kidladi.
“AQSH Erondagi ijobiy yangiliklardan g‘azablanadi va muammolar yuzaga kelishidan xursand bo‘ladi. Mamlakatdagi ko‘plab vandalizm, qotillik va tartibsizliklarda Qo‘shma Shtatlarning rolini ko‘rish mumkin. 70 yil davomida sionistik rejimning Falastindagi jinoyatlarini qo‘llab-quvvatlagani, shuningdek, 20 yil Afg‘onistonda bosqinchilik va urushni qo‘zg‘atgani ularning harakatlariga yaqqol misoldir”, — dedi Raisiy.
Avvalroq Eron oliy rahnamosi Oyatulloh Ali Xomanaiy ham mamlakatdagi ommaviy namoyishlarda AQSH va Isroilni ayblagan edi.
Erondagi hijob bilan bog‘liq namoyishlar
Eronda ommaviy noroziliklar sentabr o‘rtalaridan buyon davom etmoqda, ularga eronlik qiz Mahsa Aminiyning o‘limi sabab bo‘ldi. 22 yoshli qiz 13-sentabr kuni hijobni noto‘g‘ri o‘ragani uchun axloq politsiyasi tomonidan hibsga olingan. Shundan keyin u komaga tushib qolgan va bir necha kun o‘tgach, vafot etgan. Hukumat talqiniga ko‘ra, qiz politsiya uchastkasiga olib kelingan va u yerda yurak xurujini boshidan o‘tkazgan. Aminiyning qarindoshlari da’vo qilishicha, uning salomatligi bilan bog‘liq muammolari bo‘lmagan, ular tekshiruv o‘tkazilishini talab qilmoqda.Axloq politsiyasi
Eron Islom Respublikasi Huquq-tartibot kuchlari Ibrat patruli (“axloq politsiyasi”) — Eron Ichki ishlar vazirligi nazorati ostidagi huquq-tartibot organi. 2005-yilda alohida tuzilma sifatida ajralib chiqqan. Ibrat patruli vazifalariga Eron fuqarolari va chet elliklarning jamoat joylarida shariat bo‘yicha munosib kiyinib yurishini ta’minlash kiradi.Ayollarning boshini yopmay yurishi, ro‘mol yoki hijobni noto‘g‘ri taqishi, avratni yopmaydigan kiyim kiyishi, ba’zi hollarda esa “begona erkak bilan yaqindan muloqot qilishi” ularni hibsga olish uchun asos bo‘lib hisoblanadi.
Izoh (0)