“Umumiy yondashuvlar vaqti keldi”. To‘qayev MDH davlatlari yetakchilariga yuzlandi

Ostonada Qozog‘iston prezidenti Qosim-Jo‘mart To‘qayev raisligida MDHga a’zo davlatlar rahbarlari kengashining tor tarkibdagi yig‘ilishi bo‘lib o‘tdi, deb yozadi Tengrinews.

To‘qayev hamdo‘stlik mamlakatlari yetakchilariga Qozog‘iston o‘tgan bir yil davomida sheriklar va MDH Ijroiya qo‘mitasi bilan birgalikda olib borgan ko‘p tomonlama ishlarning asosiy yakunlari haqida ma’lumot berdi. Uning so‘zlariga ko‘ra, Qozog‘iston o‘z raisligining ustuvor vazifalariga muvofiq ishtirokchi davlatlarning ko‘plab yo‘nalishlar bo‘yicha sa’y-harakatlarini dunyo taraqqiyotining hozirgi jarayonlarini hisobga olgan holda birlashtirishga harakat qilgan.

“Hamkorlikdagi ishlar tufayli savdo-iqtisodiy hamkorlikni kengaytirish, yaqin madaniy-gumanitar aloqalarimizni saqlab qolish, shuningdek, hamdo‘stlikning salohiyati va xalqaro obro‘sini oshirishga qaratilgan bir qator muhim tashabbuslar amalga oshirildi. Oson bo‘lmagan geoiqtisodiy sharoitlarda alohida e’tibor hamdo‘stlikning iqtisodiy salohiyatini mustahkamlashga va, avvalambor, 2030-yilgacha MDHni iqtisodiy rivojlantirish strategiyasi nizomlarining bajarilishiga qaratildi. Tadbirlar rejasi birinchi bosqichining muvaffaqiyatli amalga oshirilishi ishbilarmonlik faoliyatini oshirish, o‘zaro savdo hajmini ko‘paytirish, iqtisodiyotning pandemiyadan keyingi qayta tiklanishini tezlashtirish imkonini berdi. Global va mintaqaviy iqtisodiyotdagi turbulentlik sharoitida yaqin savdo-iqtisodiy aloqalarni saqlab qolish uchun bor salohiyatni ishga tushirishimiz lozim”, — dedi Qosim-Jo‘mart To‘qayev.

Qozog‘iston prezidentining fikricha, iqlim mavzusi ayniqsa dolzarblik kasb etmoqda. Uning ta’kidlashicha, iqlim o‘zgarishi MDHning deyarli barcha mamlakatlarida suv resurslari bilan ta’minlash muammosini kuchaytirmoqda.

“Biz bu masala bilan turli xalqaro formatlar doirasida shug‘ullanyapmiz, ikki tomonlama asosda o‘zaro maqbul yechimlarni qidiryapmiz. Shu bilan birga o‘ylaymizki, butun hamdo‘stlik makonida suv xavfsizligini ta’minlash bo‘yicha umumiy yondashuvlar ishlab chiqish vaqti keldi. MDH Ijroiya qo‘mitasiga transchegaraviy suv resurslaridan o‘zaro manfaatli tarzda foydalanish bo‘yicha muayyan tavsiyalar kiritishni taklif qilaman”, — dedi Qozog‘iston rahbari.

Shu hafta Ostonada turli mamlakatlar davlat rahbarlari va vakillari ishtirokida xalqaro sammitlar bo‘lib o‘tmoqda. Shu jumladan, Osiyoda hamkorlik va ishonch choralari kengashi sammiti, MDH Davlat rahbarlari kengashi majlisi, “Markaziy Osiyo — Rossiya” sammiti o‘tkazilmoqda.