Buyuk Britaniyaning energetika regulyatori Ofgem aholi orasida axborot kampaniyasini boshladi hamda britaniyaliklarni elektr va gazni tejashga chaqirdi, deb yozmoqda Eadaily.
“Hammamiz iloji boricha energiya sarfini kamaytirish haqida o‘ylashimiz mumkin. Bu nafaqat to‘lovlarni kamaytirish yo‘li hisoblanadi balki uglevodorodlardan voz kechishga, yetkazib berish xavfsizligini ta’minlashga va ularni ijtimoiy ehtiyojlarga yo‘naltirish uchun budjet mablag‘larini tejashga yordam beradi”, — dedi Ofgem bosh direktori Jonatan Brirli.
Uning so‘zlariga ko‘ra, regulyator ta’minot kompaniyalarining iste’molchilarga qishda elektr energiyasini tejash borasidagi tavsiyalarini tarqatishga yordam beradi.
The Times xabar berganidek, oktabr boshida Buyuk Britaniya bosh vaziri Liz Trass Energetika vazirligining bunday kampaniyani boshlashiga to‘sqinlik qilgan, ammo uni tayyorlash uchun 15 million funt sterling (17 million dollar) ajratib qo‘yilgan edi.
O‘shanda Britaniyaning iqlim bo‘yicha vaziri Grem Styuart konservativ hukumat odamlarga uyidagi energiyani qanday sarflash kerakligini aytib, “otalik” qilmoqchi emasligini ta’kidlagan. Uning qo‘shimcha qilishicha, Vazirlar Mahkamasi vahima qo‘zg‘ashni istamaydi, chunki tejamkorlikka chaqirish qishda energiya taqchilligi va elektr o‘chirilishining oldini olishga urinish sifatida qabul qilinishi mumkin.
Ofgem va xususiy konsalting firmalari tahlilchilari yanvar oyiga qadar narxlar yana 2,5—3 baravar oshishi mumkinligini prognoz qildi, ammo Trass hukumati iste’molchi stavkalarini ikki yil davomida hozirgi narxda muzlatishga qaror qilgandi. Trass o‘zining iqtisodiy dasturi doirasida inflyatsiya va energetika inqiroziga qarshi kurashish uchun 130 milliard funt sterlinggacha mablag‘ ajratishni rejalashtirayotgani haqida xabar berilgandi.
Izoh (0)