Қозоғистон президенти телерадиомажмуаси МДҲ мамлакатлари етакчиларининг Остонада кенгаш йиғилишига етиб келиши акс этган видеони эълон қилди.
Унда Озарбайжон президенти Илҳом Алиев Maybach 62С ёки унинг Maybach Гуард номли зирҳли версиясида келганини кўриш мумкин.
Maybach 62 С премиум автомобили биринчи марта 2006 йилда Пекиндаги автосалонда намойиш этилганди. У 550 от кучига тенг двигатель билан жиҳозланган.
Россия президенти Владимир Путин Aurus Senat лимузинида келди. Узайтирилган Aurus Senat кузови ва ойнаси фуқаролик машиналари учун максимал бўлган ВР10 стандарти бўйича зирҳланган.
«Президент билан бирга унинг ўз автомобиллари ҳам олиб юрилади, бу масала шу билан боғлиқки, улар стратегик алоқа билан жиҳозланган, улар барча зарур хавфсизлик мезонларига жавоб беради, шунинг учун президент Федерал соқчилик хизмати томонидан ишлатиладиган автомобиллардан фойдаланади», — дея изоҳ берган эди аввалроқ Россия президенти матбуот котиби Дмитрий Песков.
Арманистон бош вазири, шунингдек, Туркманистон, Ўзбекистон, Қирғизистон, Тожикистон ва Беларусь президентлари С-классига тааллуқли Mercedes-Benz Maybach автомобилининг турли версияларида етиб келганини кўриш мумкин.
Люкс автомобиль 2017 йил апрелида Шанхайдаги автомобиль кўргазмасида оммага ҳавола этилганди.
Шу ҳафта Остонада турли мамлакатлар давлат раҳбарлари ва вакиллари иштирокида халқаро саммитлар бўлиб ўтмоқда. Шу жумладан, Осиёда ҳамкорлик ва ишонч чоралари кенгаши саммити, МДҲ Давлат раҳбарлари кенгаши мажлиси, «Марказий Осиё — Россия» саммити ўтказилмоқда.
Изоҳ (0)