Буюк Британиянинг энергетика регулятори Офгем аҳоли орасида ахборот кампаниясини бошлади ҳамда британияликларни электр ва газни тежашга чақирди, деб ёзмоқда Eadaily.
«Ҳаммамиз иложи борича энергия сарфини камайтириш ҳақида ўйлашимиз мумкин. Бу нафақат тўловларни камайтириш йўли ҳисобланади балки углеводородлардан воз кечишга, етказиб бериш хавфсизлигини таъминлашга ва уларни ижтимоий эҳтиёжларга йўналтириш учун бюджет маблағларини тежашга ёрдам беради», — деди Офгем бош директори Жонатан Брирли.
Унинг сўзларига кўра, регулятор таъминот компанияларининг истеъмолчиларга қишда электр энергиясини тежаш борасидаги тавсияларини тарқатишга ёрдам беради.
The Times хабар берганидек, октябрь бошида Буюк Британия бош вазири Лиз Трасс Энергетика вазирлигининг бундай кампанияни бошлашига тўсқинлик қилган, аммо уни тайёрлаш учун 15 миллион фунт стерлинг (17 миллион доллар) ажратиб қўйилган эди.
Ўшанда Британиянинг иқлим бўйича вазири Грем Стюарт консерватив ҳукумат одамларга уйидаги энергияни қандай сарфлаш кераклигини айтиб, «оталик» қилмоқчи эмаслигини таъкидлаган. Унинг қўшимча қилишича, Вазирлар Маҳкамаси ваҳима қўзғашни истамайди, чунки тежамкорликка чақириш қишда энергия тақчиллиги ва электр ўчирилишининг олдини олишга уриниш сифатида қабул қилиниши мумкин.
Офгем ва хусусий консалтинг фирмалари таҳлилчилари январь ойига қадар нархлар яна 2,5—3 баравар ошиши мумкинлигини прогноз қилди, аммо Трасс ҳукумати истеъмолчи ставкаларини икки йил давомида ҳозирги нархда музлатишга қарор қилганди. Трасс ўзининг иқтисодий дастури доирасида инфляция ва энергетика инқирозига қарши курашиш учун 130 миллиард фунт стерлинггача маблағ ажратишни режалаштираётгани ҳақида хабар берилганди.
Изоҳ (0)