Ukraina urushda ketma-ket muvaffaqiyatlarga erishganidan keyin, keskin burilish nuqtasiga yetib kelingan, u nizoning qattiq kuchayib ketishi xavfini yuzaga keltiradi. AQSH prezidenti Jo Bayden ma’muriyatidagilar shunday fikrni bildirmoqda.
“Biz urushda potensial keskin burilish nuqtasida turganimizni, albatta, tushunamiz, — dedi Bayden ma’muriyatining yuqori mansabli vakili The Washington Post nashriga. — Ukraina, shubhasiz, so‘nggi vaqtlarda katta muvaffaqiyatlarga erishdi va tajovuzkorroq bo‘ldi, Putin esa jang maydonida ham, uyda ham, xorijda ham qizg‘inlikni his qilmoqda”.
Nashr suhbatdoshining so‘zlariga ko‘ra, bu xavfli vaziyatdir. “Urushda keskin burilish paytlari odatda xavfli bo‘ladi. Devor ortidan nima chiqishini oldindan bilib bo‘lmaydi”, — dedi u.
Ukraina bilan ziddiyatdagi keskin burilish nuqtasi haqida Rossiya rasmiy shaxslari ham aytmoqda. “Bugungi kundan Rossiya maxsus harbiy operatsiyaning yangi bosqichiga kirishdi, — dedi Federatsiya kengashining mudofaa va xavfsizlik qo‘mitasi rahbari Viktor Bondaryov 10-oktabr kuni. — Endi yanada qat’iyroq harakat qilamiz”.
10-oktabrdan boshlab Rossiya Ukrainaning fuqarolik infratuzilmasiga, shu jumladan, energiya obyektlariga yoppasiga raketa zarbalari bermoqda. Sentabr oxirida esa Vladimir Putin safarbarlik e’lon qilib, “qo‘l ostimizdagi barcha vositalarni ishga solamiz”, degandi. Kuzatuvchilar bu gaplarda yadro qurolini qo‘llash ehtimoliga ishorani ko‘rdi.
Safarbarlik va yadroviy tahdidlar, Bayden ma’muriyatining yuqori mansabli vakili aytishicha, “ikkita narsaga ishora qilgan: Putin qanchalik yomon ish qilayotganini haqiqatan ham biladi… Avval bu shubha ostida edi”. “Ikkinchidan, bu u stavkani ikki barobar oshirayotganidan dalolat beradi. Ya’ni biz urushning oxiriga yaqin emasmiz, muzokaralarga ham yaqin emasmiz. Bu voqeliklar bu yerda hech kimni tinchlantirmaydi”, — dedi mansabdor.
Izoh (0)