Dimorf asteroidi DART zondi bilan to‘qnashganidan keyin, o‘z orbitasini o‘zgartirgan — missiya doirasida aynan shu narsa rejalashtirilgan edi. Bu haqda NASA xabar berdi.
To‘qnashuvdan keyin o‘tkazilgan kuzatuvlar ko‘rsatishicha, Dimorfning yirikroq asteroid — Didim atrofida aylanish orbital davri 32 daqiqaga — 11 soat-u 55 daqiqadan 11 soat-u 23 daqiqagacha qisqargan. Bundan tashqari, ikkita asteroidning bir-biriga nisbatan joylashuvi o‘zgargan.
DART missiyasi samoviy jism trayektoriyasini o‘zgartirishga qaratilgan tarixdagi birinchi missiyaga aylandi. Bunday texnologiya kelajakda Yerning qandaydir asteroid bilan to‘qnashuvi oldini olish uchun foydalanilishi ko‘zda tutilmoqda.
Ayni paytda Dimorf va Didim Yerdan taxminan 11 million kilometr masofada joylashgan. NASA qayd etishicha, ushbu asteroidlar Yer uchun hech qanday xavf tug‘dirmaydi.
Asteroidga zarba berildi
Eslatib o‘tamiz, Amerikaning DART (Double Asteroid Redirections Test) zondi Dimorf asteroidi parvoz trayektoriyasini o‘zgartirish bo‘yicha eksperiment doirasida ushbu fazoviy jism bilan to‘qnashgandi. Zondning asteroid bilan to‘qnashuvi Toshkent vaqti bilan 27-sentabr kuni 4:15 da yuz berdi.DART zondi datchiklar, antennalar, ionli dvigatellar, ikkita quyosh batareyasi va DRACO kamerasi (u orqali Yerga real vaqt rejimida tasvirlar yuboriladi) bilan jihozlangan, 600 kg og‘irlikka ega kub shaklidagi qurilmadir. Zondning tezligi soatiga 21 160 kilometrga yetadi. U 2021-yil noyabrida SpaceX kompaniyasining Falcon 9 eltuvchi raketasida uchirilgan edi.
Dimorf asteroidi Yerga yaqin Didim asteroid tizimida aylanib yuradi. Dimorf Yer uchun xavfli emas, uning diametri 160 metrga teng.
Izoh (0)