Rossiya prezidenti Vladimir Putin davlat to‘ntarishidan xavfsirab, Moskvaga Tezkor topshiriqli alohida bo‘lim (ODON)ni joylashtirdi, deb xabar bermoqda The Mirror Ukraina razvedkasidagi manbalariga tayanib.
Ta’kidlanishicha, ODON bo‘linmalari Rossiya poytaxtini qo‘riqlashni kuchaytirgan va bo‘linmaning barcha harbiylari to‘liq jangovar shaylikka keltirilgan.
Putinning 18 ming kishilik qo‘riqlov xizmati gumon ostiga tushgan harbiy xizmatchilarni hibsga olib, Moskvaga kirishda esa blokpostlar o‘rnatishni boshlagan. Ushbu bo‘linmaga general-mayor Nikolay Kuznetsov rahbarlik qiladi.
Ushbu voqealar Putin Ukraina maxsus xizmatlarini Qrim ko‘prigidagi “terakt”da ayblaganidan keyin sodir bo‘lgan.
ODON qo‘shinlari — Rossiya Ichki ishlar vazirligining tezkor javob ko‘rsatish ichki mudofaa bo‘linmasi bo‘lib, u Moskva shahri va viloyatida huquq-tartibotni ta’minlash masalari, shuningdek, terrorizm va ekstremizmga qarshi kurashga aloqador masalalar bilan shug‘ullanadi. Harbiy davrda ODONga muhim davlat obyektlarini qo‘riqlash topshirilgan.
Avvalroq Putin xato qarorlar qabul qilayotgani, Rossiya armiyasi holdan toygani haqida Buyuk Britaniya Hukumat aloqa markazi (GCHQ) rahbari Jeremi Fleming o‘z ma’ruzasida ma’lum qilgandi.
Qrim ko‘prigidagi portlash
Qrim ko‘prigida 8-oktabr kuni tongda yuk mashinasi portlab ketdi. Portlash tufayli shu payt ko‘prikning temir yo‘l qismida harakatlanayotgan yuk poyezdining yonilg‘i ortilgan sisternalari yonib ketdi. Oqibatda uch kishi halok bo‘ldi, shuningdek, ko‘prikning avtomobil yo‘li qismida uchta tayanch ustuni oraliqlari qulab tushdi.Ko‘prikda harakat to‘xtatildi, ko‘rfaz orqali paromlar qatnovini yo‘lga qo‘yish rejalashtirildi. 8-oktabr kuni kechki paytga kelib, ko‘prik orqali harakat qayta tiklana boshladi. 9-oktabr kuni ikkita polosa orqali harakat ham qayta yo‘lga qo‘yildi.
Rossiya javob qaytarishga va’da berdi
Qrim ko‘prigidagi portlashdan keyin Rossiya Tergov qo‘mitasi terrorizm haqida ish ochdi, mamlakat prezidenti Vladimir Putin voqeada Ukraina maxsus xizmatlarini aybladi. “Shubhasiz, bu Rossiya Federatsiyasining o‘ta muhim fuqarolik infratuzilmasini vayron qilishga qaratilgan teraktdir, — dedi Putin. — Mualliflar, ijrochilar, buyurtmachilar — Ukraina maxsus xizmatlari”.Qrim ko‘prigidagi portlash va yong‘in qo‘poruvchilik va terrorchilik harakati hisoblanadi, uning ortida esa “kriminal Kiyev rejimi” turibdi, ularni “yo‘q qilish” kerak, dedi Rossiya sobiq prezidenti, Xavfsizlik kengashi raisi o‘rinbosari Dmitriy Medvedev.
“Rossiyaning ushbu jinoyatga javobi faqat terrorchilarni bevosita yo‘q qilish bo‘lishi mumkin. Butun dunyoda aynan shunday qilinadi. Rossiya fuqarolari aynan shuni kutmoqda”, — deya fikr bildirdi Medvedev.
Ukraina shaharlariga hujum
10-oktabr kuni ertalab Rossiya Ukraina shaharlariga yoppasiga raketa hujumi uyushtirdi. Rossiya Mudofaa vazirligi mudofaa, energetika va aloqa obyektlariga hujum qilinganini aytdi, biroq fuqarolik obyektlari ham o‘qlar yomg‘iri ostida qolgan. Reuters qayd etishicha, bu urush boshlanganidan buyon Rossiyaning eng yirik havo hujumi bo‘lgan.Rossiya prezidenti Vladimir Putin 10-oktabr kuni ertalab Ukraina shaharlarining o‘qqa tutilishi Kerch bo‘g‘ozidagi Qrim ko‘prigida sodir bo‘lgan portlashga javob bo‘lganini aytdi. Biroq Ukraina prezidenti ofisi maslahatchisi Mixail Podolyak raketa zarbalari Qrim ko‘prigidagi portlashga aloqasi yo‘qligini ta’kidladi. “Rossiya armiyasining Ukraina shaharlariga yo‘naltirilgan bugungi raketa zarbalari bir necha hafta oldin rejalashtirilgan va Qrim ko‘prigidagi portlash bilan bog‘liq emas”, — dedi Podolyak.
Izoh (0)