Ukraina “holdan toygan” Rossiya kuchlariga qarshi urushda vaziyatni o‘zgartirmoqda. Rossiya armiyasi zaif holatda, uning avvalgi yutuqlari esa mag‘lubiyatlarga aylanmoqda. Bu haqda Buyuk Britaniya Hukumat aloqa markazi (GCHQ) rahbari Jeremi Flemingning ma’ruzasida aytiladi. BBC undan olingan parchalarni e’lon qildi.
“Ukrainaning jang maydonidagi va kibermakondagi dadil harakatlari vaziyatni o‘zgartirmoqda”, — dedi Fleming.
Uning so‘zlariga ko‘ra, hokimiyat hech narsa bilan cheklanmagani tufayli, Rossiya prezidenti Vladimir Putinning qarorlari xato bo‘lib chiqqan.
Shuningdek, Fleming fikricha, 10-oktabr kuni butun Ukraina bo‘ylab nishonlarga raketa zarbalariga berilganiga qaramay, Moskvada o‘q-dorilar tugab bormoqda, yaqinda e’lon qilingan safarbarlik esa Rossiya prezidentining chorasizligini ko‘rsatadi hamda uni tanqid ostida qoldirib, Rossiyaning yanada yakkalab qo‘yilishiga sabab bo‘ladi.
Uning aytishicha, Rossiya xalqi hozir “Putinning urushi” keltirib chiqargan muammolarni tushunishni boshlagan. “Ular Putin vaziyatni baholashda qanchalik adashganini ko‘ryapti. Ular boshqa sayohat qila olmasliklarini tushungan holda safarbarlikdan qochmoqda. Ular zamonaviy texnologiyalar va tashqi aloqalar keskin cheklab qo‘yilishini biladi”, — dedi Fleming.
Avvalroq G‘arb ekspertlari Ukrainadagi urush yil oxirigacha Kiyev foydasiga yakunlanishini taxmin qilayotgani xabar berilgandi. Ular yil oxirigacha urush tugab, Ukraina 24-fevralgacha bo‘lgan chegaralariga qaytishiga umid qilmoqda.
Buyuk Britaniya Mudofaa vazirligi Ukraina ham shimoli-sharqiy, ham janubiy frontlardagi hujum operatsiyalarida muvaffaqiyatlarga erishishda davom etayotganini ma’lum qilgandi.
Ukraina harbiylari Rossiya qo‘shinlari tomonidan egallab olingan Xerson viloyatida yana sakkizta aholi punktini ozod qilgani haqida Ukraina prezidenti Vladimir Zelenskiy o‘tgan hafta aytib o‘tgandi.
Shu hafta Xerson viloyatidan tashqari, Xarkov, Lugansk va Donetsk viloyatlaridagi shahar va qishloqlar ham “Rossiyaning soxta referendumidan ozod etildi”, dedi Zelenskiy. Uning so‘zlariga ko‘ra, gap ozod qilingan o‘nlab aholi punktlari haqida bormoqda.
Shuningdek, prezident ma’lum qilishicha, Ukraina armiyasi mamlakat janubida “ancha tez va shiddatli tarzda” olg‘a ketishda davom etmoqda.
4-oktabr kuni Ukraina prezidenti ofisi rahbari o‘rinbosari Kirill Timoshenko Donetsk, Lugansk, Nikolayev, Xarkov va Xerson viloyatlarida 1534 ta aholi punkti ozod etilib bo‘lganini ma’lum qildi. O‘z navbatida, Ukraina ichki ishlar vaziri o‘rinbosari Yevgeniy Yenin Xerson viloyatining o‘zida 50 ta aholi punkti ozod qilinganini aytdi.
Shu kuni Rossiya Mudofaa vazirligi Ukrainadagi jangovar harakatlar xaritasini namoyish qildi, unga ko‘ra, Xerson viloyatida front chizig‘i taxminan 30 kilometrga janubga siljigan.
Izoh (0)