16-oktabr kuni AQSH Savdo vazirligi delegatsiyasi Toshkentga keladi, deb xabar bermoqda “Dunyo” axborot agentligi.
Qayd etilishicha, O‘zbekiston elchisi Javlon Vahobov bilan bo‘lib o‘tgan uchrashuv chog‘ida Amerika delegatsiyasiga boshchilik qiladigan AQSH savdo vazirining o‘rinbosari Marisa Lago shu haqda ma’lum qilgan.
Muzokaralar chog‘ida bo‘lajak tashrif kun tartibi va o‘zaro manfaatli sheriklikni kengaytirish istiqbollari atroflicha muhokama qilingan. AQSH Savdo vazirligi vakili o‘zaro savdo va sarmoyaviy aloqalarni kengaytirishga qaratilgan qo‘shma dastur hamda tashabbuslarni ilgari surishda yordam berishga tayyor ekanini bildirgan.
AQSH hukumati O‘zbekistonning ishbilarmonlik muhiti va respublikaning sarmoyaviy jozibadorligini sifat jihatdan yaxshilash borasidagi muvaffaqiyatlarini diqqat bilan kuzatib bormoqda. Savdo vazirligi bundan keyin ham O‘zbekiston tomoni bilan yaqin hamkorlik qiladi va mamlakatdagi o‘zgarishlarni har tomonlama qo‘llab-quvvatlashda davom etadi.
Amerika delegatsiyasining O‘zbekistonda bo‘lishi davomida bir qator vazirlik va idoralarda uchrashuv va muzokaralar, Amerika va mahalliy kompaniyalarning ishlab chiqarish quvvatlari bilan tanishuvlar, Amerika Savdo palatasi - AmCham Uzbekistan a’zolari bilan alohida brifing o‘tkazish rejalashtirilgan. Bundan tashqari, AQSH Savdo vazirligining qisqa muddatli biznes amaliyoti maxsus dasturi (SABIT) bitiruvchilari va O‘zbekiston Ishbilarmon ayollar assotsiatsiyasi vakillari bilan uchrashuvlar o‘tkazilishi nazarda tutilmoqda.
Vazir o‘rinbosari boshchiligidagi Savdo departamenti delegatsiyasi pandemiya tugaganidan beri O‘zbekistonga birinchi marta tashrif buyurmoqda. Marisa Lago AQSH savdo idorasining prezident Jo Bayden ma’muriyatidagi bunday yuqori darajadagi birinchi vakili sifatida O‘zbekistonga keladi.
2018-yil oktabr oyida AQSH savdo vaziri Uilbur Ross Toshkentga tashrif buyurgan. Uilbur Ross bilan erishilgan kelishuvlarga muvofiq, 2019-yil iyun oyida AQSH Savdo vazirligining sertifikatlangan Savdo missiyasi O‘zbekistondagi biznes va sarmoyaviy muhit bilan yaqindan tanishish maqsadida Amerikaning 13 ta yirik kompaniyalari bilan Toshkentga kelgan.
Izoh (0)