“Daryo”da Qashqadaryo viloyatining Chiroqchi tumanida tug‘ilgan chaqaloq davolanish uchun Samarqand viloyatidagi shifoxonaga olib borilgani va u yerda dom-daraksiz yo‘qolgani xabar berilgandi. Bu haqda tahririyatga murojaat qilgan onaizor Ziyoda Jovliyeva ayni kunda farzandining na tirik va na o‘likligini bilmasligini aytgandi. “Daryo”ga qayta murojaat qilgan Ziyoda Jovliyeva hamda uning turmush o‘rtog‘i Otabek Ro‘zimov Samarqand shahar Ichki ishlar bo‘limi tergovchisi mazkur ishni yopganini, ularning farzandi tirik yoki o‘likligi mavhum qolayotganini aytmoqda.
Mas’ullarga murojaat qilib, agar mening bolam o‘lik bo‘lsa, o‘ligini; tirik bo‘lsa tirigini topib bering dedim. Qashqadaryo viloyat prokuraturasi va viloyat Ichki ishlar boshqarmasi voqea boshqa hududda bo‘lganligini, shu sabab voqeani o‘rganish ularning vakolatiga kirmasligini aytmoqda. Samarqand viloyati prokuraturasi esa ko‘milgan chaqaloq Qashqadaryoda ekani, shu sabab bu ish bilan Qashqadaryo prokuraturasi shug‘ullanishi kerakligini aytdi, — deydi yo‘qolgan chaqaloqning otasi Otabek Ro‘zimov.
2022-yilning 27-iyun kuni bu haqda Bosh prokuraturaga murojaat qildik. Shundan so‘ng 2-iyul kuni holat yuzasidan jinoyat ishi qo‘zg‘atildi, tergov harakatlari boshlandi. Biz dastlab boshqa bolani DNK qilganmiz. 21-sentabr kuni Samarqand shahar Ichki ishlar bo‘limi tergovchisi Jo‘rabek Pardayev bizni chaqirib, DNK qilingan bola bizning farzandimiz emasligini, bola E’zoza Umarovaga tegishli bo‘lib chiqqanini aytdi. Shu sabab ishni yopamiz dedi. Keyinroq bilsak, tergovchi bizni chaqirishidan bir kun avval 20-sentabr kuni ishni yopish bo‘yicha qaror chiqargan ekan, — deydi Otabek Ro‘zimov.Bolasi yo‘qolganini aytayotgan Ziyoda Jovliyeva farzandi sog‘lom tug‘ilganini, buni shifokorlarning o‘zi aytganini, shunga qaramasdan ular farzandini Samarqandga yuborganini bildirmoqda.
Bolamni tibbiy ko‘rikdan o‘tkazgan shifokorlar uning sog‘lomligini aytgandi. Lekin shunga qaramasdan Chiroqchi tuman shifoxonasida vakuum yo‘qligini sabab qilib ko‘rsatib, “Bolangning ertaga sog‘lig‘i yomonlashishi mumkin, shunday paytda bizga vakuum kerak bo‘ladi”, deya Samarqandga yuborishdi. Qon bosimim oshib ketgani sabab menga ruxsat berishmagach, bolamni erim va onam olib ketdi. Turmush o‘rtog‘imning mashinasida E’zoza Umarova ismli ayolning egizak farzandlari ham olib ketilgan. Samarqandda chaqaloqlarni Mavluda Hasanova ismli hamshira qabul qilib olgan. Va uch nafar chaqaloq o‘sha paytda tibbiy ko‘rikdan o‘tkazilgan hamda aynan o‘sha paytda almashtirilgan, — deydi Ziyoda Jovliyeva.Bolasini yo‘qotgan onaning aytishicha, u Samarqandga — farzandi yotgan shifoxonaga 2022-yilning 19-may kuni borgan.
Shifoxonaga borgan kunim qo‘limga begona chaqaloq berishdi. Men o‘sha paytda bola meniki emas, bu bola begona ekan dedim. Aziza opa esa “Men bolalarni almashtirmadim, shu bola seniki”, deb o‘z og‘zi bilan aytdi. Menga berilgan bola yig‘lab, ko‘karib qolardi. Mening bolamda esa bunaqa odat va kasallik yo‘q edi. 23-maygacha shubha-gumonlar bilan yashadim. 23-may kuni ketayotganimizda esa E’zoza mening qo‘limdagi bola uniki ekanligini aytib, tashlab ketishimni talab qildi, — deydi Ziyoda Jovliyeva.Yo‘qolgan bolaning otasi Otabek Ro‘zimovning ma’lumot berishicha, u 2022-yilning 6-oktabr kuni yana Bosh prokuraturaga murojaat qilgan. Shundan so‘ng Qashqadaryo hamda Xorazm viloyati prokuraturasidan unga telefon qilishib, Qashqadaryo prokuraturasi ish Samarqand viloyati prokuraturasi tomonidan ko‘rib chiqilganini, shu sabab ishni qayta ko‘rmasliklarini aytgan. Xorazm viloyati prokuraturasi esa tergov xulosasini so‘rash bilan kifoyalangan.
Mening bolam tirik, men buni yaxshi bilaman. Shu sabab prokuraturadan bolamni topib berishlarini, agar bolamni o‘lgan deyishsa, uning murdasini topib berishlarini so‘rab, ota sifatida bolam uchun aza tutishim kerakligini aytmoqchiman. Shifokorlar xatosi sabab yurak nuqsoni bilan tug‘ilgan bolalar o‘rniga mening bolam olib qo‘yilgan. Yurak nuqsoni bilan tug‘ilgan egizaklar esa vafot etishgan, — deydi u.Murojaatchining aytishicha, E’zoza Umarovaning qo‘lidagi bola uniki ekanligiga shubha qilib, DNK tekshiruvi o‘tkazilgan. Ammo er-xotin bu DNK xulosasiga ishonmayapti.
To‘g‘ri, Xadicha Sulaymonova nomidagi Respublika sud ekspertizasi markazi tomonidan DNK qilishdi. Bola E’zoza Umarovaniki ekanini aytishdi. Ammo men bu DNK xulosasiga ishonmayapman. Shu sabab xususiy klinikada yana DNK qilib ko‘rmoqchiman. Menga shu imkoniyatni berishlarini so‘rayman. Va prokuraturadan ham hech kimda shubha qolmasligi uchun ishni oxirigacha olib borishlarini iltimos qilaman, — deydi ota.
Ziyoda Jovliyeva ham E’zoza Umarovaning qo‘lidagi bolani qayta DNK qilmoqchi ekanliklarini aytmoqda.
E’zoza Umarovaning qo‘lidagi bolani yana DNK qilsak, haqiqat oydinlashadi. Dastlabki tekshiruvda mendan 10 ta, erimdan 14 ta tahlil olingan. Ammo E’zoza Umarovadan umuman tahlil olinmasdan uning bolasi bo‘lib chiqishi mumkinmi? Qolaversa, egizaklarning har ikkisida yurak nuqsoni bo‘lgan. Mening bolamda esa bunaqa kasallik bo‘lmagan. Hozir shu bolani shifokor ko‘rigidan o‘tkazib, yuragini tekshirtirsak, nuqsonsiz bo‘lib chiqadi. Men bu bola o‘zimniki ekanligiga ishonaman. Shu sabab prokuraturadan ishni qayta ko‘rib, bizda ham shubha qolmasligi uchun qayta DNK qilishimizga, bolani shifokorlar ko‘rigidan o‘tkazishga ruxsat berishlarini so‘rayman, — deydi Ziyoda Jovliyeva.Otabek Ro‘zimov shifokorlar xatoga yo‘l qo‘yganini, shu sabab otasi va ayolining sog‘lig‘ida muammolar paydo bo‘lganini aytmoqda.
Shifokorlar xatosi bilan bolam almashib qoldi. Otam shu sabab insult bo‘ldi. Xotinim esa tushkunlikdan chiqolmayapti, tentak bo‘lib qolishi mumkin. Xo‘sh, ayting-chi, men nima qilay endi?, — deydi bolasi yo‘qolganini aytayotgan ota.Bolasi yo‘qolgan ona besh oydan beri bolasidan yiroqda yashayotganini, bu unga og‘ir botayotganini bildirmoqda.
Besh oydan beri bolamdan yiroqda yashayapman. Ona sifatida bu men uchun juda og‘ir. Xotin-qizlarning dardini tinglab, ularga yordam beradiganlar bormi? Iltimos, onaizorni eshitib, adolatli qaror chiqarishsin, — deydi Ziyoda Jovliyeva.
Izoh (0)