Navoiy viloyati Karmana tumani hududidan oqib o‘tuvchi Zarafshon daryosi qirg‘oqlarida baliqlar nobud bo‘lgani haqida xabar berilgandi. Viloyat prokuraturasi baliqlar zaharlanishi ortidan “Navoiyazot” AJ mansabdorlariga jinoyat ishi qo‘zg‘atilganini ma’lum qildi.
Aniqlanishicha, 2022-yilning 4—5-sentabr kunlari “Navoiyazot” aksiyadorlik jamiyatiga qarashli 1-tashlanmasi (267-sonli quduq) orqali Zarafshon daryosiga me’yoridan ortiq darajada ifloslangan suvlar oqizilayotganligi natijasida daryodagi 2 milliard 613 million 510 ming so‘mlik jami 4204 dona turli xildagi baliqlar nobud bo‘lgan.
Mazkur holat yuzasidan joriy yilning 8-oktabr kuni Navoiy viloyat IIB huzuridagi tergov boshqarmasi tomonidan “Navoiyazot” AJ mansabdor shaxslari va boshqalarga nisbatan Jinoyat kodeksining 196-moddasi 1-qismi (atrof tabiiy muhitni ifloslantirish) bilan jinoyat ishi qo‘zg‘atilib, tergov harakatlari olib borilmoqda.
Navoiy viloyati prokuraturasi organlari tomonidan tergov jarayoni nazoratga olingan.
Bunday holat 2021-yilning oktabrida ham kuzatilgandi. Zarafshon daryosining “Navoiyazot” yaqinidagi hududida baliqlar ommaviy zaharlanib, nobud bo‘lgani yuzasidan Jinoyat kodeksining 196-moddasi (atrof tabiiy muhitni ifloslantirish) 1-qismi bilan jinoyat ishi qo‘zg‘atilgandi.
O‘zbekiston Ekologik partiyasi holatga munosabat bildirib, Vazirlar Mahkamasining 2020-yil 7-sentabrdagi “Atrof-muhitga ta’sirni baholash mexanizmini yanada takomillashtirish to‘g‘risida”gi qaroriga ko‘ra, “Navoiyazot” atrof-muhitga ta’sir ko‘rsatishning I toifasi, ya’ni yuqori darajadagi xavfli obyektlar qatoriga kirishini qayd etgandi.
Mavzuga doir: Chirchiq daryosiga o‘lik baliqlarni oqizgan mas’ullarga tegishli tartibda chora ko‘rilishi belgilandi
Izoh (0)