Навоий вилояти Кармана тумани ҳудудидан оқиб ўтувчи Зарафшон дарёси қирғоқларида балиқлар нобуд бўлгани ҳақида хабар берилганди. Вилоят прокуратураси балиқлар заҳарланиши ортидан «Навоийазот» АЖ мансабдорларига жиноят иши қўзғатилганини маълум қилди.
Аниқланишича, 2022 йилнинг 4—5 сентябрь кунлари «Навоийазот» акциядорлик жамиятига қарашли 1-ташланмаси (267-сонли қудуқ) орқали Зарафшон дарёсига меъёридан ортиқ даражада ифлосланган сувлар оқизилаётганлиги натижасида дарёдаги 2 миллиард 613 миллион 510 минг сўмлик жами 4204 дона турли хилдаги балиқлар нобуд бўлган.
Мазкур ҳолат юзасидан жорий йилнинг 8 октябрь куни Навоий вилоят ИИБ ҳузуридаги тергов бошқармаси томонидан «Навоийазот» АЖ мансабдор шахслари ва бошқаларга нисбатан Жиноят кодексининг 196-моддаси 1-қисми (атроф табиий муҳитни ифлослантириш) билан жиноят иши қўзғатилиб, тергов ҳаракатлари олиб борилмоқда.
Навоий вилояти прокуратураси органлари томонидан тергов жараёни назоратга олинган.
Бундай ҳолат 2021 йилнинг октябрида ҳам кузатилганди. Зарафшон дарёсининг «Навоийазот» яқинидаги ҳудудида балиқлар оммавий заҳарланиб, нобуд бўлгани юзасидан Жиноят кодексининг 196-моддаси (атроф табиий муҳитни ифлослантириш) 1-қисми билан жиноят иши қўзғатилганди.
Ўзбекистон Экологик партияси ҳолатга муносабат билдириб, Вазирлар Маҳкамасининг 2020 йил 7 сентябрдаги «Атроф-муҳитга таъсирни баҳолаш механизмини янада такомиллаштириш тўғрисида»ги қарорига кўра, «Навоийазот» атроф-муҳитга таъсир кўрсатишнинг I тоифаси, яъни юқори даражадаги хавфли объектлар қаторига киришини қайд этганди.
Мавзуга доир: Чирчиқ дарёсига ўлик балиқларни оқизган масъулларга тегишли тартибда чора кўрилиши белгиланди
Изоҳ (0)