“Finlyandiya standarti bo‘yicha boshlang‘ich sinflar uchun darslik tayyorlandi” — Shavkat Mirziyoyev

Shavkat Mirziyoyev Sirdaryo viloyatiga tashrifi chog‘ida jurnalistlar bilan muloqot qildi. Suhbat davomida ta’lim sohasi haqida ham gapirib, darsliklar yaratish masalasiga to‘xtaldi.

Prezidentning ta’kidlashicha, ta’lim sohasida qilinishi kerak bo‘lgan ishlar ko‘p.

“Darsliklar masalasida ham ancha muammo bor ekan, uning ichiga kirish kerak. Darsliklar saviyasi haqida katta muhokamalar bo‘ldi. Finlyandiyaning standarti bilan bir xilda 1–4-sinflar uchun darsliklar qiladigan bo‘ldik. Nimaga desangiz, Finlyandiya xalq ta’limi Yevropa miqyosida, umuman, dunyoda raqobatga chidamli, ko‘p tajribani o‘zidan o‘tkazgan” — dedi davlat rahbari.

Eslatib o‘tamiz, Xalq ta’limi vazirligi kelib tushgan 6229 ta ariza asosida boshlang‘ich sinflar uchun yangi avlod darsliklari aprobatsiyasini boshlaganini e’lon qilgan edi.