Samarqand viloyatining Past Darg‘om tumani “Do‘stlik” mahallasi hududida joylashgan “Qo‘ytepa” tepaligi o‘rnidan miloddan avvalgi III-II asrga tegishli harbiy istehkom topildi.
Tuman hokimligi matbuot xizmatining xabar qilishicha, ayni paytda ushbu joyda italiyalik hamda samarqandlik arxeolog olimlar ilmiy ekspeditsiya olib bormoqda. Ilmiy qidiruv jarayonida olimlar hududdan qala devorlari, katta ko‘za, kosa, kichik xaykalcha, muxr kabi noyob topilmalar topishgan. Olimlar ta’kidlashicha ushbu tarixiy obyekt tashqi dushmanlardan himoyalovchi harbiy istehkom bo‘lgan.
Tuman hokimi Shunqor Xudayberdiyev ushbu obyektda bo‘lib, olimlar bilan uchrashuv o‘tkazdi. Olis yurtdan kelib, tuproq ostida yashringan tarixni ochishda ko‘maklashayotgani uchun xorijlik olimlarga o‘z minnatdorchiligini bildirdi.
Shuningdek, tuman hokimligi olimlarga ilmiy qidiruv jarayonida zarur bo‘lgan moddiy-ma’naviy ko‘mak berishga tayyorligini bildirdi. Jumladan, hokim tepalikni tashqi ta’sir, jumladan, yomg‘ir, qorlardan himoya qilish uchun tarixiy obyekt ustiga temir panjara o‘rnatib, ustini to‘liq yopib berishni o‘z zimmasiga oldi.
Izoh (0)