Pasportlari yo‘qolgani sabab Umra ziyoratidan O‘zbekistonga qaytolmagan ikki fuqaroga yordam berildi

BAAda pasportlari yo‘qolgani sabab qiyin ahvolga turib qolgan ikki nafar fuqaroga yordam berildi. Bu haqda “Dunyo” axborot agentligi xabar berdi.

Ma’lum qilinishicha, O‘zbekistonning Dubaydagi Bosh konsulxonasi xodimlari ikki nafar keksa fuqaro Sharja xalqaro aeroportining tranzit hududida bo‘lib turgan vaqtida shaxsni tasdiqlovchi hujjatlarini yo‘qotib qo‘ygani sabab vatanga qaytish uchun ular amaliy yordamga muhtoj ekani to‘g‘risida xabar topganidan so‘ng masalaga oydinlik kiritish maqsadida atroflicha o‘rgandi.

Aniqlanishicha, ular Umra safarini amalga oshirib bo‘lganidan so‘ng Jidda—Sharja—Toshkent yo‘nalishi bo‘yicha O‘zbekistonga uchish vaqtida pasportlarini yo‘qotib qo‘yishgani sabab aeroportda qolib ketgan, yonlarida mablag‘ ham qolmagan.

Qiyin ahvolda qolgan keksa fuqarolarga konsullik-huquqiy yordam berish maqsadida Sharja xalqaro aeroporti huquqni muhofaza qiluvchi idoralarining mas’ul xodimlari bilan o‘tkazilgan muzokaralar natijasida ularga bepul mehmonxona, uch mahal ovqat va Sharja—Toshkent yo‘nalishi bo‘yicha bepul aviachipta bilan ta’minlash bo‘yicha kelishuvga erishilgan.