Yakunlanayotgan hafta boshida Toshkentda IIB xodimi butun o‘zbekistonliklarni haqorat qilgan bo‘lsa, qashqadaryolik mansabdor xodimlarini xo‘rlagani eshitilgan audioyozuv tarqaldi. Namangan viloyatida esa tug‘uruqxonadagi abgor ahvol tasvirlangan video chiqdi. “Daryo” hafta yakunida doimgidek haftaning eng shov-shuvli voqealarini esga oladi.
Farg‘ona viloyatida 64 yoshli qaynota avvaliga kelinini urib, hushdan ketkazdi. So‘ngra uning boshini uzib olib, tanasini axlatxonaga, boshini esa o‘zi yashovchi hududdagi fermer xo‘jaligi yerida yashirgan.
Bosh prokuratura axborot xizmati voqea sodir bo‘lganini tasdiqladi.
Mazkur holat haqiqatan ham sodir bo‘lgan. Bu bo‘yicha Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan, — deyiladi Bosh prokuratura axborot xizmatining rasmiy axborotida.Hayot Shamsutdinov “Daryo”ga qo‘shimcha qilib, voqea viloyatning Oltiariq tumanida sodir bo‘lganini, voqea yuzasidan jinoyat ishi qo‘zg‘atilib, gumonlanuvchi protsessual tartibda ushlanganini ochiqladi.
Mazkur haftada ijtimoiy tarmoqlarda Namangan viloyatining Chortoq tumanidagi tug‘uruqxona tasvirlangan video tarqaldi. Videoda tug‘uruq jarayonini o‘tkazgan 15 nafarga yaqin ayol va bolalar bir xonada yotganini ko‘rish mumkin.
Vaziyatni borib o‘rgangan “Daryo” muxbiri bilan suhbatlashgan Chortoq tuman tibbiyot birlashmasi tug‘uruqxona bo‘limi mudiri Hamida Obidova bo‘limda 50 ta o‘rin mavjudligini, video tarqalgan kuni esa tug‘ish jarayonidagi ayollar soni 90 nafardan oshiq bo‘lganini aytmoqda. Ayni paytda esa ularning soni 72 nafar, ya’ni baribir qo‘shimcha 22 ta o‘ringa ehtiyoj bor.
To‘lg‘oq tutgan ayollar soni qachon ko‘payib, qachon kamayishini taxmin qilish imkonsiz narsa. Ba’zan palatalarimizda koykalar bo‘shab qolgan kunlar ham bo‘ladi. Oldinlari, aniqrog‘i, o‘tgan asrning 80-90 yillarida Chortoq tumanida tug‘ish yoshidagi ayollar soni o‘racha 25 ming nafar, tug‘uruqxonadagi o‘rinlarimiz soni esa 160 ta bo‘lgan. Hozir tug‘ish yoshidagi ayollar soni 55 mingga yetdi, koykalarimiz esa qisqartirilib, 50 taga tushib qoldi. Shu sababli bunday mushkul vaziyatga duch kelyapmiz, — deydi Hamida Obidova.Toshkent viloyati hokimi Zoir Mirzayev fuqarolar uchun bo‘lib o‘tgan navbatdagi qabulida fuqarolarga murojaat qilib, hamma o‘z hududi bo‘yicha mas’ullarga, xususan hokimlarga murojaat qilishi kerakligini, agar muammosi hudud hokimlari orqali hal bo‘lmasa keyin uning qabulida bo‘lishlari kerakligini aytdi.
Mana Olmaliq va Ohangaron shahri, Ohangaron tumani hokimi ham bor, avval ularga murojaat qiling, hal bo‘lmasa menga keling, — dedi Zoir Mirzayev uning qabulida navbatda turgan murojaatchilarga.Bunga javoban Ohangaron tumani hokimi Abdurasul Abdullayev “Shunday murojaatlar borki, murojaatchi menga birinchi marotaba kelgan paytda, o‘n daqiqada hal bo‘ladi. Bu murojaat qonuniy bo‘lib, uni qonunan hal qilish imkoniyati bizda bor.
Ikkinchi toifadagi murojaatlar shunday muammoki, ularning yechimi mablag‘ga borib taqaladi. Bu mablag‘ga tuman budjetining qurbi yetmaydi. Shu toifadagi murojaatchilar viloyatdan ko‘proq pul olish maqsadida viloyat hokimi qabuliga kelyapti. Yana shunday murojaatchilar borki, ularning muammosini nafaqat tuman, balki viloyat ham hal qilolmaydi. Boisi uning talabi noqonuniy.
Masalan, menga uy bering deb keladi. Qonuniy tomondan olib qaralsa, unga u berish noto‘g‘ri, Nizom talabiga to‘g‘ri kelmaydi. Shu toifadagi fuqarolar viloyat hokimi, shuningdek, respublika darajasidagi tashkilotlarga borib, mana tuman hokimi murojaatimni hal etmayapti deydi. Endi xulosa o‘zingizga”, dedi.
Mazkur haftada shuningdek, Qoraqalpog‘istonning tanqidchi rahbari Amanbay O‘rinbayev 7 nafar hokimni ogohlantirdi. Amanbay O‘rinbayev yangi ish o‘rinlarini yaratish va aholi bandligini ta’minlash sohasida qilinayotgan ishlar talab darajasida emasligini aytib, mas’ullarni keskin tanqid qilgan.
Izoh (0)