Самарқанд вилоятининг Паст Дарғом тумани «Дўстлик» маҳалласи ҳудудида жойлашган «Қўйтепа» тепалиги ўрнидан милоддан аввалги III-II асрга тегишли ҳарбий истеҳком топилди.
Туман ҳокимлиги матбуот хизматининг хабар қилишича, айни пайтда ушбу жойда италиялик ҳамда самарқандлик археолог олимлар илмий экспедиция олиб бормоқда. Илмий қидирув жараёнида олимлар ҳудуддан қала деворлари, катта кўза, коса, кичик хайкалча, мухр каби ноёб топилмалар топишган. Олимлар таъкидлашича ушбу тарихий объект ташқи душманлардан ҳимояловчи ҳарбий истеҳком бўлган.
Туман ҳокими Шунқор Худайбердиев ушбу объектда бўлиб, олимлар билан учрашув ўтказди. Олис юртдан келиб, тупроқ остида яшринган тарихни очишда кўмаклашаётгани учун хорижлик олимларга ўз миннатдорчилигини билдирди.
Шунингдек, туман ҳокимлиги олимларга илмий қидирув жараёнида зарур бўлган моддий-маънавий кўмак беришга тайёрлигини билдирди. Жумладан, ҳоким тепаликни ташқи таъсир, жумладан, ёмғир, қорлардан ҳимоя қилиш учун тарихий объект устига темир панжара ўрнатиб, устини тўлиқ ёпиб беришни ўз зиммасига олди.
Изоҳ (0)