Rossiya Federal xavfsizlik xizmati Qrim ko‘prigi xavfsizligini ta’minlash uchun javobgar bo‘ladi. Bu haqda Rossiya prezidenti Vladimir Putin imzolagan “Kerch bo‘g‘ozi orqali transport o‘tishini himoya qilish chora-tadbirlarini kuchaytirish to‘g‘risida”gi farmonda aytilgan.
Xuddi shu farmonga ko‘ra, FXXga yana ikkita asosiy infratuzilma obyekti — Rossiyadan Qrimgacha bo‘lgan energiya ko‘prigi hamda Krasnodar o‘lkasidan Qrimga magistral gaz quvuri uchun “himoya choralarini tashkil etish va muvofiqlashtirish” vakolati beriladi.
Eslatib o‘tamiz, 8-oktabr kuni ertalab Qrim ko‘prigida yuk mashinasi portlab ketdi. Oqibatda ko‘prikning avtomobillar yuradigan qismida bir nechta tayanchlar oralig‘i qulab tushdi, shuningdek, ko‘prikdagi temiryo‘l orqali ketayotgan sisternali tarkib yonib ketdi. Ko‘prik yopildi, ammo shu kuni kechqurun poyezdlar harakati tiklandi. Ko‘prikning omon qolgan shoxobchasida avtomobillar harakati ham yo‘lga qo‘yildi, uning ikkinchi qismi 9-oktabrda ochilishi rejalashtirilgan.
Qrim parlamenti rahbari Vladimir Konstantinov hodisada “ukrainalik vandallar”ni aybladi.
Kerch yarim orolini Taman yarim oroli bilan birlashtiruvchi Qrim ko‘prigi Rossiya va Yevropadagi eng uzun ko‘prik hisoblanadi — uning uzunligi 19 kilometrga teng. Ko‘prik qurilishi 2016-yil fevralida boshlanib, 2019-yil dekabrida to‘liq yakunlangan. Loyiha qiymati 220 milliard rubldan oshgan.
Ko‘prikning avtomobillar uchun mo‘ljallangan qismi 2018-yil mayidayoq ochilgandi. U orqali yo‘lovchi poyezdlar qatnovi esa 2019-yil 23-dekabrdan boshlandi. Muntazam temir yo‘l yuk qatnovi 2020-yil iyulida yo‘lga qo‘yildi.
Izoh (0)