Rossiyaning Sankt-Peterburg shahri Krasnoselskiy tumanida muhojirlar orasida kelib chiqqan nizo otishma bilan yakunlandi, deb xabar bermoqda “78.ru”.
“112” xizmatiga bir necha kishi mushtlashayotgani va o‘q ovozlari eshitilgani haqida xabar kelib tushgan.
Voqea joyida o‘qotar qurol bilan boshidan yaralangan 27 yoshli O‘zbekiston fuqarosi aniqlangan. U o‘rtacha og‘ir ahvolda kasalxonaga yetkazilgan.
Jinoyatni sodir etishda gumonlanib, uch kishi — Turkmaniston, Armaniston va O‘zbekiston fuqarolari qo‘lga olingan. Ayni paytda jinoyat ishi qo‘zg‘atish masalasi ko‘rib chiqilmoqda.
O‘zbekiston Tashqi mehnat migratsiyasi agentligi Rossiyadagi mehnat migrantlari ishtirokida sodir bo‘lgan mushtlashuv yuzasidan izoh berdi.
“Ushbu janjal oqibatida O‘zbekiston fuqarosi 1994-yilda tug‘ilgan D.A. jarohat bilan shahar shifoxonasiga yotqizilgan. Hozirgi vaqtda uning holati yaxshi”, — deyiladi xabarda.
Rossiyada muhojirlarning mushtlashuv uyushtirishi tez-tez sodir bo‘lib turadi. Chunonchi, shu yilning iyulida Moskvaning sharqiy qismidagi “Rudnyovo” sanoat zonasida joylashgan qurilish maydonida 60 dan ortiq muhojir tayoq va bitalardan foydalanib, mushtlashuv uyushtirgandi.
2021-yil avgustida Sankt-Peterburgdagi Frunze tumanida o‘zbekistonlik to‘rt nafar muhojir Sofiya sabzavotlar bazasidagi janjaldan so‘ng politsiya idorasiga olib ketilgan va ma’muriy javobgarlikka tortilgandi.
Undan sal avvalroq Rossiya hukumati Moskvadagi “Kuzminki” metro bekati yaqinida ommaviy mushtlashuv sodir etgan muhojirlarning 46 nafarini mamlakatdan deportatsiya qilgandi.
Izoh (0)