Россия Федерал хавфсизлик хизмати Қрим кўприги хавфсизлигини таъминлаш учун жавобгар бўлади. Бу ҳақда Россия президенти Владимир Путин имзолаган «Керч бўғози орқали транспорт ўтишини ҳимоя қилиш чора-тадбирларини кучайтириш тўғрисида»ги фармонда айтилган.
Худди шу фармонга кўра, ФХХга яна иккита асосий инфратузилма объекти — Россиядан Қримгача бўлган энергия кўприги ҳамда Краснодар ўлкасидан Қримга магистрал газ қувури учун «ҳимоя чораларини ташкил этиш ва мувофиқлаштириш» ваколати берилади.
Эслатиб ўтамиз, 8 октябрь куни эрталаб Қрим кўпригида юк машинаси портлаб кетди. Оқибатда кўприкнинг автомобиллар юрадиган қисмида бир нечта таянчлар оралиғи қулаб тушди, шунингдек, кўприкдаги темир йўл орқали кетаётган цистернали таркиб ёниб кетди. Кўприк ёпилди, аммо шу куни кечқурун поездлар ҳаракати тикланди. Кўприкнинг омон қолган шохобчасида автомобиллар ҳаракати ҳам йўлга қўйилди, унинг иккинчи қисми 9 октябрда очилиши режалаштирилган.
Қрим парламенти раҳбари Владимир Константинов ҳодисада «украиналик вандаллар»ни айблади.
Керч ярим оролини Таман ярим ороли билан бирлаштирувчи Қрим кўприги Россия ва Европадаги энг узун кўприк ҳисобланади — унинг узунлиги 19 километрга тенг. Кўприк қурилиши 2016 йил февралида бошланиб, 2019 йил декабрида тўлиқ якунланган. Лойиҳа қиймати 220 миллиард рублдан ошган.
Кўприкнинг автомобиллар учун мўлжалланган қисми 2018 йил майидаёқ очилганди. У орқали йўловчи поездлар қатнови эса 2019 йил 23 декабрдан бошланди. Мунтазам темир йўл юк қатнови 2020 йил июлида йўлга қўйилди.
Изоҳ (0)